Улаанбаатар хотын автозамын сүлжээг өргөтгөн хөгжүүлэх, гэр хорооллын дэд бүтцийг цогц байдлаар шийдвэрлэх зорилгоор “Гудамж төсөл”-ийг хэрэгжүүлэхээр болсон. Харамсалтай нь, нуухыг нь авах гээд нүдийг нь сохлов гэгчээр асуудал ашиг сонирхлын

зөрчилтэй хутгалдаж эхлэв. Шулуухан хэлэхэд, ганц хүний бизнесийн эрх ашгийн төлөө иргэдийн эрхэд бүдүүлгээр халдав уу гэх хардлага цухалзаж байгаа юм. Овоо босгоогүй бол шаазгай хаанаас суух вэ гэгчээр “Гудамж төсөл”-ийг танилцуулсан н.Батболд “Энэ зам өндөр барилгатай хамаагүй юм шүү” хэмээн иргэдтэй уулзах яриагаа эхлүүлжээ. Тухайн үед хэн ч түүнээс энэ талаар асуугаагүй. Иймээс барилгын эзнийг сураглатал УИХ-ын гишүүн асан Р.Бадамдамдинтай холбогдох нь тэр. Түүний мэдлийнх гэх 30 давхар бүхий оффис бүхий барилга Сүхбаатар дүүргийн I хорооны нутаг дэвсгэр 220 мянгат буюу Драмын хашааны ард сүндэрлэж буй. Уг нь тус газрыг Төрийн шагналт, зууны манлай бүжиг дэглээч Ц.Сэвжидийн нэрэмжит хүүхэд залуучуудын цогцолбор болгохоор авч байжээ. Гэвч өдгөө үйл ажиллагаа нь өөрчлөгдсөн нь тэр. Газрыг хэрхэн өмчилсөн талаар бид дараагийн дугаартаа мэдээллэх болно. Гол нь тэр хавийн оршин суугчид машинаар хүрээлэгдсэн арал дээрх азгүй Робизон круза болж хувирахад хүрээд байгаа юм.

“Цэцэг” төвийн уулзвараас бидний нэрлэж заншсанаар 30-р байр буюу Ерөнхийлөгчийн өвлийн байрны хашааг нурууж эгц урагш зам гарган Сөүлийн гудамжтай нийлүүлэх зураг төсөл хэдийнэ бэлэн болсныг “Гудамж төсөл”-ийнхөн иргэдэд танилцуулсан. Улмаар Сөүлийн гудамжнаас MCS-ын байрны баруун талаар урагш зам тавьж, 220 мянгатын 4, 5, 33, 1-р байрны зүүн, “Корпорац” зочид буудлын баруун талаар явуулж, Баянгол зочид буудлын араар явсан нарийн замд нийлүүлэхээр тооцжээ. Шинээр тавигдах авто зам нийслэлдээ ганц гэгддэг уран хийцтэй, бумба суулгасан, эртний хашааг газрын хөрстэй тэгшилнэ. Маршал Чойбалсангийн орон байр, дараа нь музей байсан эдүгээ цагт 30-р харш хэмээх Засаг төрийн өмнөө барих зочид буудлын хашааг эвдэж сүйтгэн, хамар доогуур нь машин тэрэг хөлхөлдөхөөр байгааг төслийнхөн ч өөрсдөө тайлбарлаж байна билээ. Энэ ч яах вэ. Төр өмчөө мэддэг юм байж. Тэгвэл 1 дүгээр сургуулийн зүүн талаар хана, туургыг нь шүргэх шахам тавигдах энэ зам их аюул даллана гэдгийг эрх баригчид эрх биш анзаарсан байлгүй. Машин тэрэгний их дуу чимээг хайхрахаа больё. Харин замын хөдөлгөөний аюулгүй байдал аюул даллах вий. Чингэлтэй дүүрэгт байрлах 5 дугаар сургуулийн арын орон сууцны дундуур яг ийм зам тавьснаар жилдээ хэдэн арван хүүхэд авто ослоор тахир дутуу болж, зарим нь амь насаа алддагийг статистик тоо бататгаад өгнө. Ёстой л нөгөө түүгээр явсан гайг үүгээр дуудна гэгч болох гэж байгаа нь энэ. Өнгөрсөн борооны араас цув нөмөрнө гэгчээр асуудлыг араас биш урдаас сайтар төлөвлөх шаардлага бийг үүнээс гадна хэд хэдэн жишгээрээ тайлбарлаж болно.

Тухайлбал, 220 мянгатын оршин суугчдын эрх ашиг хөсөр хаягдаж, хүний тооноос хасагдах шахаад байна. Тэр хавийн оршин суугчид их дуу чимээн дунд аж төрнө. Хүүхдээ ч гэрээсээ гаргахаас айж, эмээх болно. Өнөөх Үндсэн хуулиар олгогдсон аюулгүй тайван орчинд амьдрах эрх нь хязгаарлагдах юм. Хатуухан хэлэхэд, энэ тухай тэнд дурсах ч шаардлагагүй болох вий. Цаашлаад автомашины утаагаар амьсгалж, тоосжилтоор нь хооллох хэрэгтэй болж байгаа юм. Иймээс иргэд хуулиар олгогдсон эрхийнхээ төлөө эцсээ хүртэл тэмцэхээ илэрхийлээд байна. Тэд асуудлыг нааштайгаар шийдвэрлэхгүй бол суулт зарлаж, цаашлаад өлсөхөд бэлэн байгаагаа хэлж байсан.

Төслийнхний хэлж байгаагаар цагт 750, өдөрт 10 мянган машин явдгийг судалсан гэнэ. Хэрэв зураг төслийн дагуу зам тавьбал 60 хувь бууруулахаар тооцоо гаргасан гэх. Гэхдээ ямар аргачлалаар, хэрхэн тооцоолсон нууц. Шулуухан хэлэхэд энэхүү тооцоо судалгааг тайлбарлах нь битгий хэл мэдэх хүн хураа дарам байгаа юм. Зүй нь зүүн талаасаа Хүүхдийн 100 болон Циркийн зүүн талаас Их Монголын хажуугаас орон сууцны дундуур орж “Баянгол” зочид буудлын чигт явдаг машинууд багтаж ядаж байхад Цэцэг төвөөс хойноос нь нэмж машин орж ирэх нь орчны түгжрэл, замын хөдөлгөөний ачааллыг хэд дахин нэмэгдүүлнэ гэдгийг адгийн тэнэг ч ойлгохоор аж. Мөнөөх зам цааш үргэлжилбэл тэнд байрлалтай 5, 33, 1, 2-р орон сууц, пүүс компанийн хаяавч доогуур өнгөрч “Баянгол” зочид буудалд тулж, цааш гарах гарцгүй болно. Зургаан эгнээтэй замыг хоёр эгнээгээр урсгалаа гээд түгжрэл буурна гэвэл ёстой л мянгуужингийн үлгэр болох биз. Тийм байтал энэ үлгэрийг нь сонссон иргэд дэмжиж байна гэх санал асуулгын дүн гаргажээ. Гол нь цаасан дээрх төсөл амьдрал дээр ач тусгүй, бусдын эрх ашигт халдсан гэдгийг Долоон буудалд амьдарч байгаа Должин эмээ яахан мэдэх билээ. Иймээс л 220 мянгатын тэнд тавигдах авто замын саналыг Баянхошуунд амьдарч байгаа Батаа ах, эсвэл Гачууртын Ганган анайгийн Like дарснаар асуудлыг авч үзэх нь хэр оновчтой юм бол. Цаашлаад цаас шагайж суугаа хотын удирдлагуудын like ч бусдын эрхэд бүдүүлгээр халдахад хувь нэмрээ оруулсан байна билээ.

Уг нь энэ бүхэн эерэг үр дүн үзүүлэхээсээ илүүтэй сөрөг тал ихтэйг төслийнхөн ч хүлээн зөвшөөрсөн байдаг. Хоёр машин арай ядан зөрдөг ачаалал ихтэй, нарийн замтай нийлүүлснээр түгжрэл жинхэнэ утгаараа бий болно гэдгийг ч Замын цагдаагийн газрын удирдлагууд болоод мэргэжилтнүүд хэлсэн байгаа юм. Энэ бүхнийг мэдэж байгаа төслийнхөн ч иргэдтэй уулзах үеэрээ “Та нарыг зөвшөөрөхгүй байгааг ойлголоо. Бид ямар ч байсан Цэцэг төвөөс Сөүл гудамж руу зам тавина. Харин түүнээс урагш зам тавихгүй” гэж хэлээд явжээ. Гэвч хамар нь далдлагдаж амжаагүй байхад иргэд, оршин суугчид дэмжиж байгаа тухай олон нийтийн мэдээллийн хэрэгслээр худал ярьж, зам тавихад асуудалгүй хэмээн сурталчилсан байна. Өөрөөр хэлбэл, автомашины хувийн гражтай хэсэг нөхөд л эсэргүүцсэн гэх мэдэгдлийг хийжээ.

Үр дагаварыг нь мэдсээр байж, зам тавих гэж зөрүүдлэх болсон нь ардчиллынхны үеийн арчаагүй зангуудын нэг хэмээн оршин суугчид үзэж байгаа юм. Учир нь дээрх гишүүн асан Д.Бадамдамдингийн 30 давхар бүхий оффисийн барилга тэнд бий. Мөн “Болор мэлмий” эмнэлгийн буурин дээр 20-оод давхар хоёр барилга хотын дарга нарын үг, яриа үл тоомсорлон сүндэрлэж байгаа юм. Орон сууцнуудын дунд тал талаасаа хашигдсан, гарах гарцгүй газар баригдаж байгаа эдгээр өндөр барилгуудад зориулсан төсөл ч гэж тодотгож болохуйц. Өөрөөр хэлбэл, татвар төлөгчдийн мөнгөөр зам тавиулах гэсэн явуургүй санаа цухалздаг. Учир нь “Гудамж төсөл” хэрэгжих нь нэр бүхий эрх мэдэлтнүүдэд л ашигтай. Магадгүй тэдний эрх ашигт нийцүүлэн, ашиг сонирхолд нь тулгуурлан зураг төслийг нь зурсан ч гэж хардаж болно.

Дээрх төслийг “MCS” эхэндээ эсэргүүцсэн боловч тэгс гээд намжжээ. Асуудлыг дээгүүрээ хэлэлцэж, намаар нь дарамталсан гэх явган яриа иргэдийн дунд бий. Олны үг ортой гэгчээр тус компани үг дуугарахаа больсон гэнэ. Харин оршин суугчид өнөөдрийг хүртэл эсэргүүцэн, хөлөө хүрэх газар хүртлээ асуудлыг тавьж буй. Тухайлбал, тойргоос сонгогдсон УИХ-ын гишүүн Р.Амаржаргал, Л.Гантөмөр нарт ханджээ. Нэг нь улс төрийн идэвхгүй болж, нөгөө нь давхар дээл өмссөн эрхмүүд одоогоор ямар нэгэн хариу өгөөгүй. Зүй нь сонгогчдынхоо эрх ашгийн төлөө юу ч хийхээс буцахгүй гэдгээ мэдэгдэж байсан тэд нам нэгтнийхээ бизнесийн эрх ашгийг дэмжив үү гэлтэй таг.

“Гудамж төсөл”-ийнхий хийсэн ажил эхнээсээ асуудал дагуулж, гэрэлтүүлгийн шон унасан. Азаар хүний амь нас эрсдээгүй. Нэр нь нийслэл дээр боловч Эдийн засгийн хөгжлийн сайд Н.Батбаярын шууд удирдлаган дор баг томилж, өөрийнхөө найзад тендергүйгээр ажлыг өгсөн гэдэг. Төслийн багийнхны ихэнх нь хөдөө төрж өссөн байгаа юм. Дошин дээрээ байгаа хотын дарга та хөдөөгийн хүүхдүүдийн хөглөж байгаад анхаарлаа хандуулахгүй бол горьгүй нь. Тал нутагт өссөн тэд хотын гудамжийг нарийн сайд мэднэ гэж үү. Нарийн зохион байгуулалт шаардагдах энэ төслийг самарчихаж мэдэх нь тэд. Дээр дурьдсан авто зам тавигдвал газрын шороо, эд хөрөнгийг эвдэж сүйтгэнэ. Түүхийн дурсгалт дээрх газраас гадна олон зуун бут, сөөг орвонгоороо устана. Өнөөх ардчилсан Ерөнхийлөгчийн алдарт мод тарилт эсрэгээрээ огтлолт болж хувирна. Магадгүй газар доогуурх усан хангамж, дулааны шугам хоолой, худаг тэр олон машины хөдөлгөөний даацыг дийлэхгүй байх магадлалтайг мэргэжлийнхэн хэлж байна билээ. Тэр бүхнээс илүүтэй иргэдийн тань аюулгүй, тайван орчинд амьдрах эрх боомилогдох нь. Хүүхэд гэрийнхээ үүдэнд дээр авто ослоор өөд болох эрсдэл тэнд байна. Түгжрэлийг сааруулах биш нүднээс далдлах гэсэн өрөвдөлтэй санаа цухалзаад байна, хотын дарга аа.

NEW

Эрх мэдэлтэнд ээлтэй, иргэдэд аюултай “Гудамж төсөл”
Tweet
Bolod.mn

Сэтгэгдэл (8)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
ЗӨВ ШҮҮ

2014-04-29 | 09:35:10 | 103.26.194.4 |

Зочин
б********айраад бгаарай, ард тумэн босоход бэлэн бна, наад б********ай гудамж гэх мунгу уга********таа боли ******** умхий буриад

2014-04-28 | 22:43:15 | 103.26.194.12 |

Зочин
зам барих нь зөв

2014-04-28 | 21:11:35 | 103.26.194.21 |

Зочин
зам барих нь зөв

2014-04-28 | 21:11:35 | 103.26.194.19 |

Зочин
зам барих нь зөв

2014-04-28 | 21:11:35 | 103.26.194.23 |

Зочин
зам барих нь зөв

2014-04-28 | 21:11:35 | 103.26.194.2 |

Зочин
зам барих нь зөв

2014-04-28 | 21:11:34 | 103.26.194.20 |

Зочин
зам барих нь зөв

2014-04-28 | 21:11:34 | 103.26.194.27 |