2014-03-24Би бол жирийн л дундаж орлоготой 2 ажилчны хүүхэд. Аав маань Дорнодын Хүнсний трестэд, ээж минь Махбкомбинатад ажиллаж
байгаад тэтгэвэртээ гарсан даа. Би аав, ээж хоёрынхоо хажууд байх тэр үед, хүүхэд нас маань маш сайхан, мөрөөдлөөр дүүрэн байсан. Би дунд сургуульд математик, физикийн гүнзгий ангид сурч, ирээдүйн мундаг инженер болох тухайгаа мөрөөдөж, Монголдоо анхны машин, онгоцийг бүтээх тухай төлөвлөж явсан юм.
Толгой дотроо дүүрэн мөрөөдлөө амьдруулчихаад, гэр бүлээрээ ширээ тойрон сууж, сайхан хоол амтархан идэж, гайхам зүйлийг сонирхон ярьж, бүх зүйлийг бүтнэ хэмээн хэлэлцэж, сэтгэл амар амьдарч байсан минь тэртээд үлджээ . Гэрээсээ гараад улсынхаа нийслэлд оюутан болж ирлээ.
Үүгээр түүгээр брэндийн машинууд хөлхөлдөж, энүүгээр тэрүүгээр брэндийн дэлгүүрүүд хөглөрч, энд тэнд брэнд ярьсан хүмүүс л алхална. Хөдөөгийн оюутнууд бид хотын брэндийг яаж мэдэхэв дээ, мэдэхгүй нь хүртэл соёлгүй болох юм. Завсарлагааны цаг бүр пүүзний брэндүүдийн хэлэлцүүлэг өрнөж, заал авахад энэ хэлэлцүүлэг өрсөлдөөн болон хувирна. Мэйл, мессеж, фэйсбүүк, твитер гээд маргаан, мэтгэлцээнтэй брэндийн давалгаа улам бүр хүчээ авсаар улс орноор маань бүтэн таржээ. Оюутан насаа энэ давалгаанд живүүлэхгүйн тулд тэд ихэнхдээ л баян тансаг амьдралыг мөрөөднө.
Буруутгах ч юу байхав дэ, Бүгдээрээ жаргалыг л хүсдэг хойно . Би ч гэсэн энэ үеэс Маш том компанийн захирал, маш их мөнгөтэй хүн болохыг л мөрөөдөх болсноо нуух юун. Дунд сургуулийн найз маань надад би эмч болж ДОХ-ыг эмчлэх эм бүтээнэ гэж ярьдаг байсан цаг саяхан санагдаж байна. Гэвч найз маань давалгаанд өртсөөн. Одоо тэр аавынхаа үлдээсэн байраар Ландкрузер авчихаад бензинийхээ мөнгөний төлөө бизнес нэрээр покер тоглож явна. Олон сайхан охид баялаг амьдралыг бүтээх тухай ярьдаг байлаа, одоо тэд баян залуутай суух тухай л ярьдаг боллоо. Бид бие биедээ уншсан ном, сурсан сургууль, мэдсэн зүйл, харсан юмаа ярьж хуваалцдаг байлаа, одоо унасан машин, өмссөн хувцас, мэдсэн брэнд, харсан баяныхаа тухай ярьж сайрхдаг боллоо.
Миний эх орны мянга мянган залуусын Хорвоо дэлхийг, Хүн төрөлхтнийг, Хойч үеийг өөрчлөх сая сая мөрөөдлүүд хийж бүтээх чин эрмэлзлээр тэжээгдэн тэдний зүрхэнд амьдарч байсан цаг саяхан. Хуучныхаар бол залууст маань Бодит амьдрал үзүүлж хатуужуулдаг гэх оюутны цөөхөн он жилүүд маань Бараан амьдралд нухалж, туйлдуулдаг болжээ тэднийг маань. Утаан хөшиг татсан Улаанбаатар, Удаан суусан удирдлагууд, Улам ихсэж буй авилгачид, Уруудан доройтох амьдрал – Энэ бүхэн л залуусыг маань ээлж дараагүй туйлдуулсаар, сайхан мөрөөдлийг нь ч арчжээ.
Энэ олон сайхан мөрөөдлүүд, хүсэл эрмэлзлүүд амьд байсан бол маш их зүйлийг хийж бүтээж өгөх байсандаа эх оронд минь, гэж би хаяа боддог л юм.
Бид Брэндийг хэрэглээд байна уу? Брэнд биднийг хэрэглээд байна уу? Та сайн бодоорой. Одоо та гараад Улаанбаатарын гудмыг хар. БИД УТААГ БРЭНД БОЛГОЧЛОО, БИД БӨГЛӨРӨЛИЙГ БРЭНД БОЛГОЧЛОО.
ОДОО ӨӨРЧИЛЬЕ, БИД МӨРӨӨДЛИЙГ БРЭНД БОЛГОЁ.
Өнөөдөр Их эзэн Чингис хааны мэндэлсний 850 жилийн ой, Монгол бахархалын өдөр.
Их хаан минь хүлэг мөрөөдөөгүй, хатан мөрөөдөөгүй, харин АГУУ ГҮРЭН БАЙГУУЛАХЫГ МӨРӨӨДСӨН, АЗИЙН ЦЭЭЖИНД НАРАН МАНДУУЛАХЫГ МӨРӨӨДСӨН. Бид өнөөдөр үүгээр бахархаж байна. Бид өнөөдөр МОНГОЛ БАХАРХАЛЫН ӨДРӨӨ ТЭМДЭГЛЭЖ байна.
Монголчууд тэнгэр заяат, хөх толбот хүмүүс. Бид төв азийн цээжинд 3 Францыг нийлүүлсэн газар, 3-хан саяулаа амьдардаг. Бид хүнээсээ 15 дахин их малтай. Бид малаа л голцуу иддэг. Бид өлсөх үү. Бид газар доор байгаа нүүрсний нөөцөөрөө дэлхийд 10-рт, газрын ховор элементийн нөөцөөрөө 2-рт, ураны нөөцөөрөө 16-рт, Зэс, Жоншныхоо нийлүүлэлтээр дэлхийн зах зээлийн энэ төрлийн бүтээгдэхүүний нийлүүлэлтийн 10 орчим хувийг хангах гэж байна.
Ийм байхад бид ядуу, байна, өлсөж байна гэж ярих шал дэмий хэрэг. Ганц машин, ганц байрны тухай мөрөөдөх ч тэнэг хэрэг.
Гэсэн хэдий ч бид энэ тухай ярьсаар л байна. Яагаад?
Миний баялгийг надаас харамлаж, миний хүсэл мөрөөдлийг боомилж, бидний гэрэл гэгээтэй ирээдүйг гуйвуулж байгаа хэсэгхэн улс төрчдөөс болж миний эх орны мянга мянган залуус машин, байр төдийхнийг мөрөөдөж, мөрөөдлөө дарлуулж явна.
Залуу хүн та, Залуусаас голдуу бүрдсэн, Залуусаар голцуу бүтээгдсэн, Залуухан Монгол улсынхаа Засаг төрийг барилцахын тулд Заавал сонгуульдаа ялаарай!
Орон нутгийн сонгуульд намтай, намгүй нэр дэвшиж буй бүх залуустаа урам өгөхийг хичээлээ.
Залуусаа дэмжээрэй Залуусаа……!
Б.Хаянхярваа
.jpg "Томруулж харах")
.jpg "Томруулж харах")
.jpeg "Томруулж харах")
.jpg "Томруулж харах")
