Цэргүүдээ дагуулсан Ц.Энхбаяр сайдынхаа тушаалыг тэрслэв

2014-03-21

Гэмтэл согог судлалын үндэсний төвийн даргын үүрэг гүйцэтгэгч Ц.Энхбаярыг эрэн хайх ажиллагаа өчигдөржин үргэлжлэв.

Өрөөнд орох гэтэл хаалга нь түгжээтэй, утас руу нь залгатал холбогдох боломжгүй гэснээс үүдэн Эрүүл мэндийн сайдын тушаалаар шинэ томилогдсон дарга А.Мөнхтайванд ажлыг нь хүлээлцүүлэх үүрэг хүлээсэн ажлын хэсгийнхэн "захирал" гэсэн өрөөний үүдэнд баахан сууж сууж буцсан байна. Энэ тухай тус эмнэлгийнхэн ярьж "Ажил эхлэх үеэс л Ц.Энхбаярыг хүлээлээ, ирсэнгүй. Эмнэлэгт хэвтсэн гэсэн сураг сонсогдсон ч яг хаана гэдэг нь бүү мэд. Эмнэлгээрээ хайж, түүний байж болох бүх газар луу нь утасдлаа. Гэвч сураг гаргаж чадсангүй.

Уг нь түүний томилсон хүмүүс нь Ц.Энхбаярыг хаана байгааг мэдэх байх гээд асууж сураглах гэсэн ч тэд бас ажилдаа ирээгүй. Яг одоогоор Ц.Энхбаяртай нийлээд манай 20-иод дарга өрөөндөө алга байна" гэсэн юм. Ингэснээр хагас жил гаруйн хугацаанд асуудал дагуулсан Гэмтлийн эмнэлэг тойрсон дуулиан сая нэг шийдэгдэх нь гэсэн ч үүрэг гүйцэтгэгч Ц.Энхбаяр хаалга үүдээ түгжээд, эмнэлгийн тамга тэмдэг аваад зугтсан гэх шинэхэн, бас сонирхолтой үйл явдлаар баяжиж орхилоо. Бид энэ асуудлаар Эрүүл мэндийн сайдаас тодруулах гэсэн ч болсонгүй. Харин нэрээ хэлэхийг хүсээгүй өөр эх сурвалж "Яг энэ асуудлаар яаманд хөөрхөн асуудал дэгдэж байна. Байгууллагын тамга тэмдэг аваад нуугдаж орхисон Ц.Энхбаярыг яаж олох вэ хэмээн дээр дооргүй эрэл хайгуул хийж байна" хэмээсэн бол ажил хүлээлцэх үүрэг хүлээсэн Эрүүл мэндийн яамны Хяналт шинжилгээ, үнэлгээ, дотоод аудитын газрын дарга С.Төгсдэлгэр тэргүүтэн "Бид 11:00 цагийн үед ирсэн. ГССҮТ-ийн захирлын сонгон шалгаруулалтад тэнцэж, Эрүүл мэндийн сайдын тушаалаар томилогдсон А.Мөнхтайван ажлаа өнөөдөр /өчигдөр/ албан ёсоор хүлээж авах ёстой байлаа. Гэтэл Ц.Энхбаяр өрөөндөө байдаггүй. Одоо ирэх болов уу гээд хүлээж байна" хэмээн учирласан юм. Тэдний батлан өгүүлснээр Ц.Энхбаяр тэргүүтэй тус эмнэлгийн удирдлагууд өнөөдөр /өчигдөр/ ажил хүлээлцэнэ гэдгийг тун сайн мэдэж байсан бөгөөд ажил хүлээлцэх болохоор гэв гэнэт алга болсон нь яах аргагүй санаатай үйлдэл гэдгийг яамныхан онцлон хэлж байгаа юм.

Бид яг энэ асуудлыг тус эмнэлгийн эмч ажилчдаас мөн тодруулсан. Харин тэд "Ц.Энхбаяр өчигдөр /уржигдар/ өдөржин өрөөндөө байсан. Өөрийнхөө томилсон бүх хүнийг өрөөндөө дуудаж, хаалгаа дотроос нь түгжчихсэн байсан. Сураг сонсоход баахан тушаал шийдвэр гаргаад байсан гэнэ билээ. Гэхдээ яг ямар тушаал шийдвэр гаргасныг нь нүдээр хараагүй учраас хэлж мэдэхгүй байна" хэмээсэн юм. Ийнхүү ГССҮТ-ийн даргын үүрэг гүйцэтгэгч Ц.Энхбаяр тамга авч зугтсан нь тодорхой боллоо. Уг нь Ц.Энхбаяр өөрийгөө шударга, зарчим ч гэж ирээд ярьдаг. Гэвч түүний энэ үйлдлээс харахад тэрбээр дарга гэсэн зөөлөн суудалд хууль зөрчөөд ч хамаагүй тухалж суух дуртай, бас өөрийг нь үхтэл хамгаалдаг Н.Удвал бас УИХ-ын дарга З.Энхболын нэр нүүрийг боддоггүй хүн бололтой. Яагаад гэвэл түүний энэ тэнэг үйлдэл нь "Би Н.Удвал сайд болон Төрийн албаны зөвлөлийнхөнтэй эцсээ хүртэл үзэлцэнэ" гэсэнтэй агаар нэг сонсогдож буй юм. Иймээс хүнээ олж томилж чадаагүй эрхэм сайд Н.Удвал ГССҮТ- ийн захирлын үүрэг гүйцэтгэгч Ц.Энхбаярын өмнө хүчгүй, сул гэдэг нь харагдаж байна.

Ер нь ЭМЯ-нд өмнө нь тамга тэмдгээ авч зугтаагаад Н.Удвал сайдыг яг үүнтэй адил эвгүй байдалд оруулсан үйл явдал гарч л байсан. Тодруулбал, өнгөрсөн оны зургадугаар сард Н.Удвал сайдын туслах Баярцэцэг яамны тамга тэмдгийг авч зугтсан хачирхалтай үйлдэл гаргаж байлаа. Тухайн үед энэ мэдээлэл олон хүний анхаарлыг татаж, тэр ч бүү хэл ЭМЯ-ныхан нэг хэсэг шоконд орсон байдаг. Энэ тухай нэхэн сануулахад өмнөх сайдын үед ажиллаж байсан зарим газар, хэлтсийн дарга нар Н.Удвал сайдыг үндэслэлгүйгээр ажлаас халсан хэмээн Захиргааны хэргийн шүүхэд нэхэмжлэл гаргасан бөгөөд шүүх тэднийг хууль бусаар ажлаас халсан байна хэмээн ажилд нь эргүүлэн авах шийдвэр гаргасан юм. Тэр ч бүү хэл Төрийн албаны зөвлөл болон Шүүхийн шийдвэр гүйцэтгэх ерөнхий газраас хууль бусаар ажлаасаа халагдсан гэх Энхболдыг ажилд нь буцаан томилохыг яаманд удаа дараа мэдэгдсэн байдаг юм. Гэтэл ЭМЯ- ны газрын дарга Цолмонгэрэл өрөөгөө түгжээд алга болсон бөгөөд "Сонгуульд ажиллаж байна" гэсэн сураг сонсогдож байв. Гэтэл төрийн жинхэнэ албан хаагч сонгуульд ажиллах нь хуулиар хориотой байдаг аж.

Тиймээс Төрийн нарийн бичгийн даргын ажил хүлээлцүүлэх тушаал гаргатал туслах нь сайд Н.Удвалынхаа зааварчилгаа ёсоор тушаал баталгаажуулах үүрэгтэй байсан ч тэрбээр мөн л нуугдаж тоглосон байдаг юм. Үүнээс болж тус яамны ажил хэд хоног гацаанд орж тушаал шийдвэр гаргах нь битгий хэл яаралтай албан бичигт хариу өгч чадахаа больсон гээд бөөн дуулиан дэгдэж байлаа. Мөн санхүүгийн ямар ч баримтад тамга дарагдахгүй хүлээгдэж байгаагаас тус яамны Санхүү эдийн засгийн хэлтсийн мэргэжилтнүүд арга мухардаж сайдын туслах руу удаа дараа утас цохин, мессэж илгээж байж тэрбээр ирэхдээ төрийн тусгай хамгаалалтын хар машинд суун өрөөгөө хамгаалуулан байж хэдэн бичигт тамга дарсан байдаг юм. Гэтэл ГССҮТ-д өнөөдөр яг ийм асуудал үүсч Н.Удвал сайдын итгэлт хүн Ц.Энхбаяр төрийн тусгай объектын тамга тэмдгийг авч зугтав. Ингэснээр Н.Удвал сайдыг салбараа мэддэггүй, хүнээ таньдаггүй нэг үгээр бол салбараа базаж чадаггүй сайд гэсэн бас нэг имиж дагах нь.