Ц.Элбэгдорж: Төр сайн ажиллая гэвэл улам нээлттэй бай

2013-10-25

Монгол Улсын Ерөнхийлөгч Ц.Элбэгдорж өнөөдөр нийслэлд ажиллаж, цаг үеийн ажилтай танилцлаа. Нийслэлийн 374 жилийн

ойн өмнө Монгол Улсын Ерөнхийлөгч нийслэлийн ажилтай танилцаж байгаад Нийслэлийн ИТХ-ын дарга Д.Баттулга талархал илэрхийллээ. Нийслэлийн шинэчлэлийн баг энэ өдрийг жилийн ажлаа дүгнэх, алдаа оноогоо хэлэлцэх өдөр болгон тэмдэглэхээр болсон юм. Нийслэлийн Засаг дарга бөгөөд Улаанбаатар хотын захирагч Э.Бат-Үүл Төрийн үйлчилгээний шинэчлэл болон иргэдийн оролцоо идэвхи санаачилгыг нэмэгдүүлэх талаар хийсэн ажил, бүтээн байгуулалтын ажлын явц цаашдын зорилтын талаараа ерөнхийлөгчид танилцууллаа.

Өнгөрсөн нэг жилийн хугацаанд төрийн үйлчилгээг хүнд сурталгүй, чирэгдэлгүй болгох зорилгоор Засаг даргын захирамж, гадаад томилолтын зардлын тайлан, төсвийн тайлан, тендерийн мэдээллийг ил тод болгож, нийслэлээс гарах шийдвэрт иргэдийн оролцоог нэмэгдүүлснээр гарсан шийдвэр үр дүнд хүрч, бидний ажил урагштай байна” гэж хотын дарга хэллээ.

Мөн хотод хийсэн бүтээн байгуулалтын ажлууд өмнөх жилүүдээс хэд дахин өссөн, жил гаруйн хугацаанд 145,4 км авто зам шинээр барьж өргөтгөсөн, иргэд орчноо сайжруулах санаачлага гаргаж бүтээн байгуулалтаа өөрсдөө гардан хийдэг болсон, нийслэлийг цэцгээр гоёсон, гудамж, талбайгаа угаадаг болсон гээд шинэчлэлт, бүтээн байгуулалтын ажлуудаасаа танилцуулсан юм. Тэрээр төсвийг танаж тайрч байгаа нь бүтээн байгуулалтын ажилд саад учруулж байгаа гол бэрхшээл болж байгааг Ерөнхийлөгчид дуулгалаа. Нийслэлийн Засаг даргын Санхүү эдийн засгийн асуудал хариуцсан орлогч Н.Батаа “Улаанбаатар хотыг 2020 он хүртэл хөгжүүлэх төлөвлөгөөнд 25,4 их наяд төгрөгийн бүтээн байгуулалтын ажил хийхээр төлөвлөсөн. Энэ нь жилд дунджаар 2,8 орчим их наяд төгрөгийн хөрөнгө оруулалт хэрэгтэй гэсэн үг. Бид ирэх оны хөрөнгө оруулалтыг энэ жишгээр тооцон нарийн судалгааг гаргасан” гэв.

Ерөнхийлөгч Ц.Элбэгдорж “Төсвийн танаж тайрч байгаа нь гаднаас орж ирэх хөрөнгө оруулалтын хэмжээ багассантай холбоотой. Тиймээс бүтээн байгуулалтын ажилд гадны хөрөнгө оруулалтаас гадна хувийн хэвшлийн хөрөнгө оруулалтыг татах, хөнгөлөлттэй зээлээр хөрөнгө оруулалтаа босгох хэрэгтэй, 30-40 жилийн хугацаатай хөнгөлттэй зээл бондоос хамаагүй бага зардалтай, хөнгөн нөхцөлтэй байдаг. Тиймээс хөрөнгө оруулалтын орчноо бий болгож дараа нь хөнгөлттэй зээл, хамгийн сүүлд бондын хөрөнгийн тухай ярих хэрэгтэй гэж зөвлөсөн юм. Улаанбаатар хотын удирдлагуудын гаргасан шийдвэр 48 цагийн дотор цахим хуудсанд тавигдаагүй бол хүчингүйд тооцогддог болсон.

Монгол Улсын Ерөнхийлөгч уулзалтын үеэр www.ulaanbaatar.mn цахим хуудсанд нэвтэрч, Засаг даргын Захирамж, төсөв, тендер, гадаад томилолтын зардлын тайлантай танилцсан юм. Уулзалтыг хааж Монгол Улсын Ерөнхийлөгч Ц.Элбэгдорж хэлсэн үгэндээ “Өнөөдрийн уулзалтаар ажиглагдсан нэг зүйл бол та бүхэн үлгэр дууриал авахаар олон ажлыг хийсэн нь харагдлаа. Улаанбаатар хотод хийгдэж байгаа сайн зүйлс нь бусад аймаг, сумдад сайн үр нөлөө, сайн жишиг үзүүлдгийг ажигласан. Аймаг, сумын Засаг дарга н

ар аймаг, сумынхаа хэмжээнд нийслэлтэй ижилхэн зүйл яриад эхэлдэг. Иймээс та бүхэн энэ эрчээрээ улам сайн ажиллаарай. Асуудлын шийдлийг иргэдтэйгээ нээлттэй ярилцах хэрэгтэй. Юмыг зөв шийдье, төр сайн ажиллая гэвэл улам нээлттэй байж, иргэдийг улам илүү оролцоотой байлгах хэрэгтэй. Тэгвэл хүмүүс илүү итгэлтэй болж, асуудлыг ойлгоно. Төрийг харддагаа болино. Төрийн нэр хүнд, үйлчилгээ улам сайжирна. Нэг зүйл хүсэхэд ажлаа хэмжиж болохуйц, хүрч болохуйц болгох хэрэгтэй. Энэ нь Улаанбаатар хотын өрсөлдөх чадварын түвшинг тодорхойлох. Энэ жил өрсөлдөх чадвараараа ийм төвшинд байна, дараа жил энд хүрнэ гэж зорьж ажиллаж, зэрэгцүүлж харах юмыг бий болгох хэрэгтэй. Өмнө хийж байгаагүй шинэ ажлыг ойролцоо бүс нутгийн бусад хотуудтай зэрэгцүүлж болно.

Монголын төрийг лиценз, тусгай зөвшөөрлөөс салгах хэрэгтэй. Зарим ажлыг гэрээгээр шилжүүлж болно. Төр шаардлагагүй ажил, лиценз зөвшөөрөл, ашиг сонирхол, авлига, хахууль хөөцөлдсөн буруу ажил хийж байвал үүнийг мэргэжлийн холбоод, иргэний нийгэм, иргэд рүү шилжүүлж болно. Бизнес болгож болно.

Тэгвэл төрийн хэмжээ багасна. Барилгын зургийн зөвшөөрлийг энд нэг хэлтэс юм уу, Барилгын яам олгодогийг болиулаад барилгын зурагт дүн шинжилгээ хийдэг, хариуцлагаа хүлээсэн мэргэжлийн холбоо нь зөвшөөрөл өгдөг байя. Харин төр хянадаг байх ёстой. Хууль зөрчсөн байвал төр шийднэ. Гэтэл зөвшөөрөл өгдөг бизнесийг нь төр авчихаад байна. Үүнээс болж Монголын төр маш их томорсон. Хөрөнгө оруулалт, цэцэрлэг, сургууль, иргэдийн нийгмийн асуудлыг шийддэг төсөв нэмэгддэг, төрийн захиргааны шинжтэй бусад төсвийг хэдэн жилээр царцаах хэрэгтэй. Ингэвэл манай төрийн байдал байрандаа очно.

Үүнийг хийхэд Улаанбаатар хот, Улаанбаатар хотын удирдлага манлайлж, энэ санаачлагыг дэмжиж ажиллаарай. Хүрсэн амжилтаа улам баталгаажуулж, цаашдаа улам сайн ажиллаарай. Ингэж итгэж байгаа шүү” гэлээ