тэрбээр бурхнаас заяасан хамгийн үнэтэй бэлэг хэмээн ярьдаг юм билээ. Чадалтай, өвөртөц хоолойноос гадна бүтээлч зан чанар нь түүнийг амжилтад хүрэх үндэс болсон. Урлагийнхан угаасаа уйгагуй бүтээлч хүмүүс гэхдээ С.Наран бүр илүү зүтгэлтэй гэж найзууд нъ түүнийг үнэлдэг юм билээ. Бүтээлч бүсгүй өчнөөн жил урлагт үнэнч зүтгэж байгаа ч бие даасан ганцхан тоглолт хийсэн. Удаах тоглолтоо энэ сарын 31- нд төлөвлөөд байгаа юм. Тоглолтынх нь өмнө түүний талаарх зарим мэдээллийг уншигчдадаа хургэхээр зэхээд байна. Монголд С.Наранг танихгүй хүн байхгүй ч, шүтэн биширч, дууг нь сонсдог олон мянган фэнд нь нэмэлт мэдээлэл болно гэдэгт итгэж байна.

Хэл сурах нь түүний бас нэгэн авъяас

Тэрбээр хоёр охин, хоёр хүүтэй айлын дунд хүүхэд. Хөвсгөл аймгийн Мөрөн суманд төрж өссөн. Дунд сургуульд хичээлдээ сайн, нийгмийн идэвхтэй охин байсныг ангийнхан нь хэлдэг юм билээ. Орос хэлний хичээлд дуртай, түүнийгээ ч гүнзгийрүүлэн судалдаг байж. Тэгээд ч тэр үү гадаад хэлний мэдлэг, ярих чадвараараа урлагийнхан дотроо дээгүүр бичгдэх хэмжээнийх. Урлагт дуучин болоогүй бол гадаад хэлний гайхамшигтай мэргэжилтэн байх байсан ч юм бил үү. Гэхдээ С.Нарангийн сонголт хэл судлаач биш, жүжигчин. СУИС-ийн Кино драмын ангид сурч мэргэжлийн жүжигчин болсон ч төрөлхийн чадалтай бас өвөрмөц хоолой нь дуучны замд хөтөлжээ. Олон сайхан дуугаа ард түмэндээ хүртээж, хайр хүндэтгэлийг нь хүртсэнийхээ дараа ч өөрийгөө хөгжүүлсээр явсан. Тодруулбал, Бээжингийн Драмын академид урлагийн менежментээр сурч төгссөн. Тэнд сурч байхдаа шаггүй оюутан гэдгээ нотлоод авсан гэдэг. Хичээлдээ видео камер авч ороод багшийнхаа хэлсэн, үзүүлсэн бүрийг бичиж авчихаад гэртээ хариад дахин дахин үзэж, хичээлээ давтдаг түүний шаргуу, зүтгэлтэй зан чанарыг багш нар нь хамт сурдаг байсан оюутнуудад нь магтдаг байсан гэдэг.

Хаана ч өөрийнхөөрөө байх дуртай

“Хүмүүс хоолойны минь өнгийг ямар бүдүүн юм бэ гэдэг. Гэхдээ би үүнд огтхон ч эмзэглэдэггүй. Би хэн нэгнийг дуурайж хувцаслаж, алхаж гишгэж, дуулж дуугарч байвал би Наран биш болно” гэж хэзээд, хаана ч өөрийнхөөрөө баихыг эрмэлздэг гэж ярьдаг юм билээ. Нээрээ ч түүнтэй хаана, хэдийд ч таарсан стиль имиж, өнгө төрхөө хувиргаагүй Наран өөрөө л байдаг. Тэрбээр ‘Хүн бүр бурханы давтагдашгүй бүтээл. Тиймээс өөрт байгаагаа голж, шунах хэрэггүй. Шунал ямар ч зүйлд хэмжээнээсээ хэтэрвэл өөрийгөө ороодог аюултай” гэсэн бодолдоо үнэнч гэсэн.

Тус усын ялгааг хүмүүст ойлгуулахыг хичээдэг

Үнэхээр хийе гэсэн хүнд туслах дуртайгаа дуучин бүсгүй нуудаггүй. Гэхдээ бэлэн зүйлээр туслахыг хүсдэггүй. Учир нь түүнд тус биш ус болж байна гэж үздэг. Нэгч гэсэн хүнд бэлэнчлэх сэтгэлгээ бус хийе бүтээе гэсэн сэдлийг төрүүлэхийг эрмэлздэг аж. Тиймээс хэн нэгэнд тус хургэхээр шийдсэн бол загас авч өгдөггүй, харин загас барихад нь дэм болохыг илүүд үздэг гэнэ. Тэгвэл тухайн үед биш ч, хожим нь ч түүний тусыг мэдэрч баярлах болно гэж үздэг. Түүний бас нэг эмзэглэдэг зүйл нь монголчуудын атаач зан. Өөдөө гарах гэсэн нэгнийгээ өөлж, муулж, харддагийг эрс буруушаадаг. Энэ буруу зуршлаа гээчихвэл монголчуудын сэтгэлгээ өөрчлөгдөж, хөгжих боломжтой гэж ярьдаг. Харин хүний сэтгэл зурх, сэтгэхүйд чиглэсэн тусламжийг хэнээс ч харамлахгүй гар сунгаж чаддаг нь С.Нарангийн давуу тал. “Саихан” нэртэй цомгоо гаргачихаад, дээжийг нь буяны үйлст хандивлаж байсан. Харин шашин шүтлэгийн хувьд ч тэр өөрийн гэсэн хатуу бодолтой. Буддаг шүтэж, гүн гүнзгий судалсан гэдэг. Мөн иогоор хичээлдэг гэсэн.

Кинонд тоглоогүй цөөхөн дуучдын нэг

Одоо цагт дуучин, бүжигчин, загвар өмсөгч гээд хэн ч хамаагүй кинонд тоглож, дэлгэцийн бүтээлийн гол баатрууд болох гэж зүтгэдэг болсон. Кинонд дүрээ мөнхлөөгүй цөөхөн дуучны нэг С.Наран. Түүнд киноны санал ирдэггүй гэдэг юу л бол. Харин кино урлагийг хүндэлсэндээ зориглодоггүй байж мэднэ. Эсвэл, өөр ямар нэгэн учир байдаг эсэхийг хараахан мэдэж чадсангүй. Юутай ч урлагт хүчин зүтгээд багагүй хугацаар үдсэн ч одоо хүртэл нэг ч кинонд ядаж туслах дүр бүтээгээгүй гэхээр сонин. Тэр тусмаа мэргэжлийн жүжигчин байж шүү дээ.

Ц.Оюунгэрэл сайдад хичээл зааж байжээ

Соёл, спорт, аялал жуулчлалын сайд Ц.Оюунгэрэл өмнө нь дуу султайгаасаа болж сонирхолтой илтгэлүүдээ санасандаа хүртэл тавьж, олны анхаарлыг өөртөө төвлөрүүлж чаддаггүй байсан гэнэ. Энэ дутагдлаасаа яаж ангижрах вэ, яаж мундаг илтгэгч болох вэ хэмээн толгойгоо гашилгасны эцэст дуучин С.Наранд хандахаар шийдсэн гэсэн. Туүн дээр очоод “Би индэр дээр гараад ярихаар танхимд цугласан хумүүсийн олонхид нь миний дуу хурдэггүй. Тэд сонсч чадахгүй болохоороо анхаарал хандуулдаггүй. Би хүмүүсийн анхаарлыг яаж өөртөө татаж, чанга ярьдаг болох вэ, надад туслаач” гэсэн гэдэг. Дуучин бүсгүй түүнд дуртайяа тус болж гамм уншуулан хоолойн өнгийг засах, биеэ барихгүй байж сурахаас эхлүүлээд бүхнийг заасан гэдэг. Энэ тухай сайд “Түүнээс ихийг сурсан. Одоо ямар ч том танхимд хэчнээн олон хүнд илтгэл тавьсан ч тэд над руу анхаарлаа хандуулж чаддаг болсон” гэх бахдан ярьдаг юм билээ.

Үс нүдний шил нь түүний имижийг илтгэдэг

Түүний имижийг өвөрмөц хэмээн хүн бүр ярьдаг. Гэхдээ тэр хэн нэгнээс ялгарахын тулд биш, өөрөөрөө байхын тулд л содон имиж бүрдүүлдгээ хаана ч хэлдэг. Ягаан үс нь зохино гэж янзтай. Үсний өнгөтэйгээ хослуулан нудний шил зүүдэг түүний цуглуулгад нь 100 гаруй шил байдаг гэсэн. Нүдний шилнийх нь хамгийн хямд нь 100 юанийнх, үнэтэй нь 900-гаад мянган төгрөгийнх гэж өөрөө хэлсэн. Гэхдээ тэрбээр нүдний шилээ сонгохдоо заавал брэнд гэж чамирхдаггүй гэсэн шүү. Тэрбээр нүдэндээ анхаарал их тавьдаг учраас олон шил цуглуулсан гэдэг юм. Урлагийнхан тайзан дээр ч, телевизийн эфирт ч байнга хурц гэрэлд байдаг учраас чанартай шилээр нүдээ хамгаалах хэрэгтэй болдог гэсэн. Түүнээс биш, нудэнд нь ямар нэг гажиг байхгүй. Тэр ч бүү хэл, хараа нь тун сайн гэсэн шуу.

Англиар цомгоо гаргасан анхны монгол дуучин

Түүний аав Хөвсгөл аймгийн модны үйлдвэрийн даргаар олон жил ажилласан, боловсрол өндөртэй нэгэн байжээ. Хүүхдүүдийнхээ боловсролд ихээхэн анхаарал хандуулдаг аавынхаа ачаар хүүхдүүд нь бүгд хэл усны мэдлэг сайтай гэнэ. Дуучин бүсгүй орос, англи, хятад, японоор ярьж, ойлгож, бас бичиж ч чадна. АНУ-ын Лос Анжелест сурч ирээд англиар дуулсан дуунуудаараа цомог гаргасан. Ингэснээр Монголд анх удаа англи хэл дээр цомгоо гаргасан дуучин болсон юм. Гэхдээ түүнийгээ миний магистрын ажлын судалгаа байсан гэж даруухан зан гаргасан. Тэрбээр бусдын адил юм юмны түрүүнд байдаггүй. Од гэхээсээ илүү эгэл амьдралыг илүүд үздэг. Тиймдээ ч хийсэн зүйл арвин, бутээл олонтой хэрнээ тэр бүр тайлагнаад байдаггүй.

Түүний турах арга

Нэг хэсэг дуучин С.Наран багагүй жин нэмсэн. Бүр 85 кг болтлоо таргалсан гэдэг. Гэхдээ нэг ч удаа элдэв тураах бэлдмэл хэрэглэж байгаагүй. Харин фитнесс, усан спортоор хичээллэж жингээ хасч, гоолиг болж чадсан гэсэн. Гоо сайхны мэс заслыг буруушаадаггүй. Үүнийгээ тэрбээр “Хүн ганц амьдрах насандаа сайхан байхыг хүсэх нь зөв шүү дээ. Харин хагалгаа хийлгэх эсэх нь хувь хүний өөрийнх нь сонголт хэмээн тайлбарласан байсан. Гэхдээ дуучин бусгүй өөрөө биеийнхээ аль ч хэсэгт мэс хүргүүлж үзээгүй гэдэг.

Поп дива С.Нарангийн “My voice” айсуй

Тэрбээр дөрвөн жилийн өмнө“My voice” хэмээх анхны бие даасан тоглолтоо хийж байсан. Харин “My voice-II” нь энэ сарын 31-нд ганцхан удаа болно. Бусад дуучин шиг жил бүр тоглолтоо хийдэггүй болохоор нэлээн чансаатай, шинэ бүтээл арвинтай болж таарна хэмээн фэнүүд нь тэсэн ядан хүлээж байгаа. Түүнийг хүндэтгэн уран бутээлийн андууд нь ая дуугаа өргөхөөр ирнэ гэсэн. Тэдний дунд, гавьяат жужигчин Ө.Уянга, “Хурд” хамтлагийн Д.Отгонбаяр, Морин хуурын чуулгынхан байгаа юм билээ.