Ричард Рамирез нь 1960 оны 2 дугаар сарын 28-ны өдөр төрсөн. Мексикийн Тёхас мужийн Элл Пассо

 хотод мэндэлсэн тэрээр 15 хүний амь насыг хороосон хэргээр цаазаар авах ялаа хүлээн шоронгийн өрөөнд хоригдож байгаа юм. Ричард Рамирез 1980-аад оны сүүлээр "Шөнийн ангууч" гэсэн нэрээрээ дуулиан тарьж байсан нэгэн. Таван настайдаа гэр бүлийн хамт АНУ-д цагаачлан ирсэн ба түүний аав нь түргэн ууртай, муйхар нэгэн байсан аж. Эцэг эхийн хараа хяналтаас гарсан 8 настай Рамирез цавуу үнэрлэж, мариухан татаж мансуурах донтой болж, зан араншингийн хувьд ч психопат /эмгэг зан төрх/ болж эхэлсэн байна.

Дунд сургуулиа бүрэн дүүргэж чадаагүй тэрээр сургуулиа орхиж гэмт хэргийн зам руу орж машин хулгайлж, мансуурсан хэргээр цагдаагийн байгуулагад хэд хэдэн удаа баригдаж байв. Рамирез авга ах Майк дээрээ өссөн бөгөөд түүнийг алуурчин болоход авга ахын нь нөлөө багагүй байсан. Авга ах Майк нь Веьтнамын дайны үед тусгай хүчинд алба хааж байсан бөгөөд веьтнам цэргүүдийг зэрлэгээр тамлан алж, хороож байсан гэрэл зургуудыг Рамирезэд үзүүлдэг байснаас алуурчны гэмт зан төрх бүрдэж эхэлсэн гэдэг.

Түүнийг 12 настай байхад нь авга ах Майк нь эхнэрээ түүний нүдэн дээр амь насыг хохироож, сэтгэл зүйн цочролд орсон байна. Хожим цуврал алуурчин мэдүүлэхдээ "Би анх энэхүү аллагыг харснаас хойш хүнийг алах юу ч биш юм байна, амархан юм байна гэж бодож эхэлсэн. Яваандаа би хүн алах дуртай болж тэдний цусанд шунаж эхэлсэн" гэсэн байдаг.

1985 оны 3 дугаар сарын 17-нд Рамирез 22 настай Мариа Эрнандс руу гэрийнх нь гадаа байхад довтолжээ. Түүнийг гэрлүүгээ орохынх нь өмнө буудсан бөгөөд мөн ойролцоо байсан Дэйл Оказаки \34 настай\ гэгчийг буудан хороожээ. Эрнандс золоор амьд үлдэж сум түүний халаасанд байсан түлхүүрийг оносноос эрч нь буурсан байна. Оказакийг алснаас цагийн дараа Монтеррэй цэцэрлэгт хүрээлэнд очиж 30 настай Цай Лиань Юүнийг машиндаа сууж байхад нь хэд хэдэн удаа бууджээ. Цагдаагийн ажилтан хохирогчийг олох үед дөнгөж амьд байснаа эмнэлгийн тусламж ирэхээс өмнө амьсгал хураажээ.

Нэг өдөр гарсан дээрх 2 халдлага хэвлэл мэдээллийн хэрэгслээр тэр даруй цацагдаж хүмүүсийг айдас, шоконд оруулж аюулгүй байдлаа хангахын тулд дор бүрнээ арга хэмжээ авцгааж байлаа. Гэмт этгээдийг хэн ч тодорхой дүрсэлж чадахгүй байлаа. Урт хар үстэй, хурц догшин харцтай, том арзгар шүдтэй гэж тодорхойлж явган алуурчин гэж нэрлэж байв.

Дээрх гэмт халдлагаас хойш 10 хоногийн дараа 64 настай өндөр настан Винсент Зазарра түүний эхнэр Максин Зазарра нарыг гэрт нь буудаж амь насыг нь хохироосон хэрэг гарав. Хадагтай Зазаррагийн биеийг зэрлэгээр тохуурхан даажигнаж, тамлаж зовоосон нь илт байлаа. Хэргийн газар очсон цагдаа нар аймшигтай аллагын дүр төрхийг хараад орж чадахгүй цочирч байв. Рамирез хэргийн газар хөлийн мөрөө үлдээснийг цагдаагийн байгууллагын шинжээчид гэрэл зураг, тухайн үеийн криминалистик арга хэрэгслээр бэхжүүлэн авчээ. Тэтгэврийн хөгшдийг тэдний хүү Петрийн гэрт байхад нь дээрх хэрэг гарсан байна. Хэргийн газраас олдсон галт зэвсгийн сум өмнө гарсан хэргийнхтэй тохирч байгаа нь шинжээчийн дүгнэлтээр тогтоогдов. Мөрдөгчид хэргийг үйлдэж байгаа этгээд цуврал аллага үйлдэж байгааг анхааралдаа авч өргөн бүрэлдэхүүнээр хэрэг мөрдөх ажиллагааг явуулж эхлэв.

Шуурхай ажиллаж, сэжигтний ам зургийг гарган, урьд ижил төстэй аргаар, галт зэвсэг ашиглан хүч хэрэглэсэн хэргээр шалгагдаж байсан хүн нэг бүрийг шалгаж эхэлсэн байна. 2 сарын дараа гэмт этгээд хохирогч Зазаррагийн хөрш Хятад гаралтай тэтгэврийн хөгшид болох эхнэр нөхөр Харолд, Джэйн Ву нарыг хэрцгийгээр хүчирхийлжээ. Ямар ч шалтгаангүй гэмт этгээд тэднийг амьд үлдээхээр шийдсэн байна. Амьд үлдсэн хохирогчид ойролцоох цагдаагийн хэсэг дээр очиж урт хар үстэй, аймшигтай харгис хэрцгий эрийн халдлагын тухай мэдээлжээ.

Хэвлэл мэдээллийн хэрэгслээр гэмт этгээдийг "Шөнийн ангууч" гэж нэрлэн ам зургийг мэдээллийн хэрэгслээр гаргаж эрэн сурвалжилж байлаа. 1985 оны 5 дугаар сарын 29-ний өдөр гэмт этгээд 83 настай Малвиал Кэллэр түүний дүү 80 настай хөгжлийн бэрхшээлтэй Бланч 2-ынх нь хоолойг хэрчиж, нэгийг нь зодож алсан байна. Хохирогчдыг бүгдийг нь гэртээ байхад нь гэмт хэрэгтэн халджээ.

7-р сарын 5-нд 16 настай Уйтни Бэннэтэд халдаж төмөр саваагаар цохиж гэмтээсэн боловч хохирогч амьд үлджээ. 1985 оны 7-р сарын 7-нд 63 настай Фортуна гэгч эмгэн рүү сэжигтэн этгээд дайрчээ. Гэмт этгээд эмгэнийг хүчиндэхийг оролдож эмгэн орилж хашгирсан тул зугтан оджээ. Иймэрхүү байдлаар 7 сарын 20-нд иргэд рүү халдсан хоёр ч тохиолдол бүртгэгдэв. Санвалли дахь 32 настай Читат Асавам болон түүний эхнэр Сакима нар луу хүч хэрэглэн довтолжээ. Үүний дараагаар 66 настай хөгшин эмгэн, өвгөн 2-ыг буудсан байна. Гэмт хэрэгтэн гэнэт урьдчилан таахын аргагүйгээр ихэвчлэн өөрийгөө хамгаалах чадваргүй өндөр настан, гэр бүлийн хосууд руу гэртээ байхад нь хүч хэрэглэн довтолж, хүчиндэж байгаа нь сэтгэл зүйн дүр төрхийг үүсгэхэд тодорхой мэдээллийг өгч байв.

8-р сарын 6-нд Кристофер, түүний эхнэрийн араас гэмт этгээд бууджээ. Хохирогчид зугтаж нуугдан амьд гарав. Үүнээс ахин 2 хоногийн дараа Даймонд баранд халдлага гарч Ахмед Зиаг буудаж түүний эхнэрийг хүчиндэж, зэрэмдэглсэн байна. Хохирогчдын дүрслэж байгаагаар сэжигтэн явган, урт хар үстэй, гялалзсан нүдтэй нэгэн байсан гэж байгаа нь гэмт хэргийг нэг л хүн үйлддэг гэсэн мөрдөгчдийн таамгийг улам лавшруулж байв. Үүнээс хойш 10 хоногийн дараа буюу 8-р сарын 17-нд 66 настай хөгшин эрийг буудан хороож түүний эхнэрийг хүч хэрэглэн зоджээ. Амьд үлдсэн эхнэрийн мэдүүлэг сэжигтнийг бэлгийн асуудалтай байгааг нотолсон байна. Ийм маягаар "Шөнийн ангууч"-ийн халдлага улам бүр аюултай болж давтамж нь ойртох болов.

Тухайн үед байсан хэвлэл мэдээллийн хэрэгслүүд гэмт хэрэгтнийг улам бүр дэврээж, иргэд улам бүр айдаст автаж, гэрийн үүд хаалга, аюулгүй байдалд анхаарч байлаа. Цуврал алуурчныг түүний хамгийн сүүлд үйлдсэн хэргийн хохирогчийн мэдүүлэгт үндэслэн баривчилсан байна. Биг Карнс түүний сүйт бүсгүй Эриксон нар руу луу галт зэвсэг хэрэглэн халдаж, залуугийн толгой тус газар буудаж, эмэгтэйг хүчирхийлсэн байна. Тэднийг хар талын хүчин Сатанаг шүтэж, түүнд хайртай гэж хэлэхийг шаардсан байдаг. Сэжигтэн зугтах үед амьд үлдсэн хохирогч түүний царай зүс болон унаж явсан улбар шар өнгийн тоёота машиныг харж амжжээ. Хохирогчийн мэдүүлгийн дагуу цагдаагийн  байгууллагаас автомашиныг нэн даруй эрэн сурвалжлах ажиллагааг эхэлж, удалгүй нэгэн галт тэрэгний буудлаас олов.

Бүртгэлээс үзэхэд машин хулгайлагдсан байсан бөгөөд жолоочийн залуур, толиноос хурууны хээ илэрснийг шинжилгээнд өгчээ. Тэр дороо хариу гарч урьд цагдаагийн байгууллагад удаа дараа согтуугаар танхайрсан, хүнд халдаж байсан хэргээр баривчлагдаж байсан Ричард Рамирез болох нь тогтоогдож нэн даруй түүний байгаа газрыг тогтоохоор ажиллаж эхлэв. Хэрэгтэнг баривчлах ажиллагаанд ахин хүний амь нас хохироохгүйн тулд цагдаагийнхан болгоомжтой ажиллаж Ло-Анжелост машин хулгайлахаар завдаж байхад нь дайралт хийсэн байна. Тэр зугтаж биедээ гэмтэл учруулсан тул яаралтай тусламж үзүүлж, аюулгүй болгосон байна.

АНУ-ын түүхэнд хамгийн их зардал гаргаж, хамгийн удаан үргэлжилсэн шүүх хурлуудын нэгээр цуврал алуурчин Р.Рамирезийн шүүх ажиллагаа нэрлэгддэг. Түүний шүүх хурал бүтэн хоёр жил үргэлжилснээс гадна нэг удаа завсарлаж, 1600 иргэдийн төлөөлөгч, 100 гаруй гэрч, мөн өдий төдий аллагын баримт, батлагдаагүй сэжиг таамгууд байснаас аллага 13, алахаар завдсан үйлдэл 5, бэлгийн хүчирхийлэл 11, хулгайн 14 үйлдэлд прокурор яллаж оролцжээ.

Сунжирсан, дуулиантай шүүх хурлын явцад иргэдийн төлөөлөгч Филис Синглтари гэртээ буудуулж нас барсан нь шүүх хурлыг завсарлахад хүргэжээ. Иргэдийн төлөөлөгчид айж, хүмүүсийн дунд Рамирез шоронгоос хамсаатантай холбогдож хэрэгт хамааралтай иргэдийн төлөөлөгчдийг алж байна гэсэн цуу яриа дэгдсэнээс бүгд хуралд оролцохоос татгалзав. Мөрдөн шалгах ажиллагаа явагдаж энэ хэрэгт Рамирез хамааралгүй харин хохирогчийн найз түүнийг хардсаны улмаас буудсан болохыг олж тогтоосноор шүүх хурал ахин үргэлжилжээ. Удаж удаж гарсан шүүх хурлын шийдвэрээр түүнийг хийгээр хордуулж, цаазаар авахаар ял шийтгэсэн боловч өнөөг хүртэл гүйцэтгээгүй байна.

Тэр Сатанист, галзуу мэт рок дуу сонсож, мансуурах дуртай байснаас хэрэгт дуртай зарим нэг хүмүүс шоронд байгаа түүн рүү захидал бичиж, түүнийг шүтэж байгаагаа илэрхийлэх болжээ. Энэ үед түүн рүү 75 удаа захидал бичсэн Дорин Лио гэгч чөлөөт сэтгүүлийн эрхлэгч эмэгтэй анхаарлыг өөртөө татаж чадсанаар тэд шоронд гэрлэжээ. Лио Рамирезийг цаазаар авсан өдөр амиа хорлоно хэмээн гэрээслэл үлдээсэн ба 2006 онд шүүх түүний давж заалдах хүсэлтийг ахин авч хэлэлцэх шаардлагатай гэж үзээд байгаа юм байна. Одоо тэрбээр сан Квентиний шоронд байгаа.

ЭХ СУРВАЛЖ: ХОРИОТОЙ БҮС СОНИН