Монголын дартс сонирхогчдын холбооны тамирчин Д.Эрдэнэчимэг уг тэмцээнээс дээд лигийн эмэгтэй ганцаарчилсан төрлөөр анх удаа дэлхийн аваргын алтан цомыг эх орондоо авч ирлээ.

Эмэгтэй, эрэгтэй ганцаарчилсан, хос болон багийн төрлөөр зохиогдсон энэ тэмцээнд Монголын дарстсын холбоо нь дөрөв дэх жилдээ оролцож байгаа юм. Уг тэмцээн болон дартсын спортын талаар Монголын дартс сонирхогчдын холбооны удирдах зөвлөлийн гишүүн С.Гэрэлтуяатай ярилцлаа.

-Монгол Улс анх удаа дартсын дэлхийн аваргатай боллоо. Тамирчид хэзээ эх нутагтаа ирэх вэ?

-Дартсын спортын тэмцээн олон төрлөөр зохиогддог. Ганцаарчилсан, хос, багийн төрөл байдаг. Энэ удаагийн тэмцээнд ганцаарчилсан төрлөөр манай улс нэлээд амжилт үзүүллээ. Багийн болон хосын төрлөөр манайх өмнө нь ч амжилт үзүүлж байсан. Ганцаарчилсан төрөл нь дээд, дунд, доод лиг гэж байдаг.

Манай холбооны гишүүн Д.Эрдэнэчимэг дээд лигт тэргүүлж, дэлхийн аваргын цомыг анх удаа хүртлээ. Мөн энэ удаагийн тэмцээнд дээд лигийн эмэгтэй ганцаарчилсан төрлөөр Ц.Баатар гуравдугаар байрт шалгарч хүрэл медаль, эрэгтэй ганцаарчилсан төрлөөр Б.Биндэрьяа мөнгө, Х.Одхүү IV байр, хосын төрлөөр Б.Биндэрьяа, Х.Одхүү нар мөнгөн медаль хүртсэн өндөр амжилтуудыг гаргалаа. Тамирчид маань энэ сарын 29-нд /өнөөдөр/ эх орондоо ирнэ. Бид ч их сэтгэл догдлоод хүлээж сууна.

-Д.Эрдэнэчимэг өмнө нь ямар тэмцээнүүдэд амжилт гаргаж байв?

-Д.Эрдэнэчимэг маань дартсын спортоор хичээллээд зургаан жил болж байгаа. Германд олон жил амьдарсан. Тэр хугацаандаа Германы тамирчидтай олон улсын чанартай тэмцээнд оролцож туршлага судалж байсан юм билээ. Саяхан монголдоо ирсэн.

Өмнө нь дартсын спортын нэгдүгээр зэрэгтэй байсан бол одоо олон улсын тэмцээнд тэргүүн байр эзэлсэн болохоор олон улсын хэмжээний мастер цол авах нь тодорхой болоод байна. Д.Эрдэнчимэг мөн түрүү жилийн дэлхийн цомын аварга шалгаруулах тэмцээнээс анхны хүрэл цомыг хүртэж байсан юм.

Мөн өнгөрсөн дөрөвдүгээр сард Азийн дартсын холбооноос зохион байгуулсан “Азийн цомын аварга шалгаруулах тэмцээн”-ээс хосын төрлөөр манай холбооны тэргүүн М.Эрдэнийн хамт оролцож, аваргын алтан цомыг хүртэж байсан удаатай.

Харин өнгөрсөн долдугаар сарын 20, 21-нд БНХАУ-ын нийслэл Бээжин хотноо зохиогдсон “Бээжин-2013” анхны олон улсын нээлттэй тэмцээнээс эмэгтэй ганцаарчилсан төрлөөр Д.Эрдэнэчимэг бид хоёр V байрт шалгарч, тусгай байрын шагналыг хүртэж байлаа.

Ингээд ярьж хэлээд байвал манай холбооны амжилт жил ирэх тусам дээшилж байгаа. Мөн энэ спортыг сонирхож ойлгох, хичээллэх хүмүүсийн тоо манай холбоог үйл ажиллагаагаа явуулж эхэлснээс хойш нэмэгдсэн гэж хэлж болно.

-Монголын дартсын холбоо, танай холбоо хоёр юугаараа ялгаатай юм бэ?

-Монголын дартсын холбоо манай холбооноос олон жилийн өмнө байгуулагдсан. Гэхдээ үйл ажиллагаа нь түр хугацаанд тасалдаж, тэмцээн уралдаан зохиохоо болиод байсан гэж хэлж болно. Харин Монголын дартс сонихогчдын холбоо байгуулагдаад дөрвөн жил болж байна.

Манай холбоо тамирчдынхаа чансааг ахиулахын тулд холбооныхоо гишүүдийн дунд сар бүр сарын лигийн тэмцээн зохиодог. Биднийг үйл ажиллагаа явуулж эхэлснээр Монголын дартсын холбооны үйл ажиллагаа сэргэж манайхтай ижил сар бүр тэмцээн зохиох болсон.

Мөн манай холбоо Олон улсын дартсын холбооны албан ёсны гишүүн байгууллага. Манай холбооны тамирчид байнга л олон улсын чанартай тэмцээнд оролцдог. Анхандаа олон улсын тэмцээнд оролцоход биднийг үл тоодог байлаа.

-Дартсын спортыг монголд хөгжүүлэхэд хэр бэрхшээлтэй байна вэ?

-Хамгийн түрүүнд бидэнд мэргэжлийн дартсын самбар хэрэгтэй байсан. Дартст софт болон хард самбар гэж бий. Олон улсын тэмцээн бол цахилгаан самбар буюу софт самбар хэрэглэдэг. Удахгүй хоёр сарын дараагаас манай холбоо дэлхийн чанартай тэмцээнд хэрэглэдэг мэргэжлийн 12 софт самбартай болох гэж байгаа.

Урьд өмнө нь олон улсын тэмцээнд оролцохдоо хард самбар дээр бэлтгэл хийж байгаад софт самбар дээр тэмцээнд оролцоход хүндрэлтэй байдаг байсан. Харин софт самбартай болсоноор бидэнд улс орныхоо нэрийг дэлхийд гаргах боломж нэмэгдэж байгаа юм.

-Танай холбоонд одоогоор хэчнээн гишүүн байна вэ?

-Яг одоо манай холбооны гишүүнчлэлтэй, татвараа төлдөг 100 гаруй гишүүн бий. Ихэнх гишүүд маань энэ спортоор хичээллэхийнхээ хажуугаар өөр ажил эрхэлдэг болохоор тэмцээнд гишүүдийн 70-80 хувь нь оролцдог. Дартсын спортоор гэр бүлээрээ хичээллэх нь их байдаг.

Тухайлбал, манай холбооны тэргүүн М.Эрдэнэ гэргийнхээ хамт дартсын спортоор хичээллэж, тэмцээнд оролцдог. Мөн манай холбооны “Ахан дүүс” гэж нэрлэдэг баг байдаг. Төрсөн ах дүү нар хамтарч баг болж тэмцээнд оролцдог.

-Монголын дартсын холбоо, танай холбооноос гадна энэ спортоор үйл ажиллагаа явуулдаг байгууллага бий юу?

-Манай холбооны дэргэд олон клуб бий. Тэр дундаа байгууллагаараа нэг клуб болсон нь их. Тухайлбал, Үндэсний статистикийн хорооны “Есөн сум”, НЗДТГ-ын “Хангарьд”, Баянзүрхийн цагдаагийн “Шонхор” зэрэг клуб тогтмол үйл ажиллагаагаа явуулж байна.

-Таны хувьд энэ спортоор хэдэн жил хичээллэж байгаа вэ?

-Би дартсын спортоор хичээллээд гурван жил болж байна. Энэ хугацаанд тогтмол амжилт үзүүлж ирсэн. Анх найзыгаа дагаж энэ спортод орж байсан. Хамгийн анх тэмцээнд оролцоод эмэгтэй ганцаарчилсан төрөлд, мөн холимог хосын төрөлд хүрэл медаль хүртэж байлаа.

Яг тэр үед Нийслэлийн тамгын газраас өсөх ирээдүйтэй шилдэг тамирчинд олгодог “Хангарьд” цомын эзэн болсон. Заримдаа ажлаасаа болоод оролцож чадахгүй байх тохиолдол бий. Олон улсын чанартай тэмцээн гэвэл өнгөрсөн оны дэлхийн цомын аварга шалгаруулах тэмцээнд оролцож 17 дугаар байрт шалгарч байсан.

Мөн Бээжингийн олон улсын нээлттэй тэмцээнд оролцоод ирсэн. Энэ тэмцээнд зургаан орны 70-аад эмэгтэй тамирчинтай өрсөлдөж V байрт шалгарсан. Энэ удаагийн дэлхийн цомын аварга шалгаруулах тэмцээнд ажлаасаа болоод явж чадсангүй.

Ер нь дартсын спортоор хичээллэгсдийн дунд зохиогддог хамгийн том тэмцээн бол “IDF DARTS WORLD CUP” буюу дэлхийн цомын аварга шалгаруулах тэмцээн байдаг.

-Энэ спортоор хичээллэхийн давуу тал юу вэ?

-Монголд дартсын спорт хөгжөөд 20 жил өнгөрсөн байна. Нэг үеэ бодоход дартсын спортыг манайхан мэддэг, ойлгодог болчихож. Анх биднийг шанхай уруу дэлхийн цомын тэмцээнд оролцоод ирлээ гэхэд дартс гэж юу юм, зах дээр сум шидээд байдаг мөн үү гэдэг байсан. Одоо бол бүх зүйл өөр болсон.

Дээр дурдсанчлан гэр бүл, найз нөхөд, хамт олноороо хичээллэхэд дартсын спорт хамгийн тохиромжтой. Зарим спортын төрөлтэй харьцуулахад тусгай хэрэгсэл, орчин шаардлагагүй. Дартсын самбар, сум байхад гэртээ, ажил дээрээ хаана ч хичээллэж болно. Дартс бол оюун ухааны спорт.

Чи маш сайн тооцоолж сумаа шидэх хэрэгтэй. Хүмүүс хөндлөнгөөс хараад хараа их чухал юм байна гэдэг. Үнэндээ дартсын спортод хараа биш гарын мэдрэмж хамгийн чухал. Мөн ухаан санаа, сэтгэл зүйн хувьд тогтуун байх шаардлагатай.

Энэхүү спортоор хичээллэснээр залуучууд чөлөөт цагаа зөв боловсон өнгөрүүлэх боломжтой. Зугаа цэнгээний газарт бус дартс шидэж алжаалаа тайлдаг олон залуусыг би мэднэ. Бид долоо хоногт гурван удаа ажлаа тараад клубтээ цуглаж, хоорондоо тоглож бие биеийнхээ чадварыг хөгжүүлдэг.

Манай холбоо жил бүрийн аравдугаар сард нийслэлийн ойг угтаж “Нийслэл өргөө” тэмцээн зохион байгуулдаг. Энэхүү тэмцээн маань гурав дахь жилдээ энэ намар зохиогдох гэж байна. Мөн жил бүр улсын аварга шалгаруулах тэмцээнийг явуулдаг. Гэхдээ улсын аваргад сонирхсон хүн бүр оролцдоггүй.

Бүтэн жилийн турш чансаагаараа бусдыгаа тэргүүлсэн эрэгтэй 16, эмэгтэй 16 тамирчныг сонгож, хооронд нь өрсөлдүүлж улсын аваргаа тодруулдаг. Мөн дартс нь олимпод орох спортын жагсаалтын дээгүүрт ордог.

2016 оны олимпод чадахгүй ч 2020 оны олимпод оролцох эрхтэй болно гэж бид найдаж байгаа. Тиймээс ирээдүйд бид олимпоос медаль хүртчихлээ гээд сууж байхад гайхах зүйл байхгүй л болов уу.

-Дараагийн оролцох ямар тэмцээн байна вэ?

-Ирэх сарын дундуур Малайзад дэлхийн чансаа олгох тэмцээн болно. Миний хувьд цаг зав, мөнгө төгрөгийн боломжтой бол оролцох хүсэлтэй байгаа. Манай холбооны тамирчид одоохондоо өөрсдийн зардлаар олон улсын тэмцээнд оролцдог болохоор ойр ойрхон олон улсын чанартай тэмцээнд оролцох боломж байдаггүй. Гэхдээ тухайн тамирчин ямар нэг байгууллагатай хамтран ивээн тэтгүүлэх боломж нээлттэй.

Г.Нямсүрэн

Эх сурвалж: Үнэн.мн