2012.12.06 : Миний бамбарууш хурдан том болж байгаа.Томрох тусмаа л аав болоод байх юм.Харин уйлахаараа ээж гэж хэлсэн.Миний хувьд инээхээрээ ээжтэйгээ адилхан ш дээ тийм үү.

2013.03.01 : Чи минь ширээ сандал түшээд л гүйчихдэг боллоо.Орж гарсан хүмүүс шиг сайн уу ? баяртай гээд л, рекламаар гарсан ах эгч нар аа дуурайж дуграад л.Ямар эгдүйтэй байдаг гээч.Аав ээж 2 нь охиндоо үнэхээр их хайртай шүү.

2013.05.05: Сайн уу миний охин. Ээж нь ирээдүйд нь мэндэчилж байна аа.Чамайг минь өнөөдрөөс аав нь харахаар болж ажлаасаа чөлөө авлаа.Ээж нь харин эргээд ажилдаа орох юм.Миний хайр ч их хөглөх байх даа, одоо хүртэл тэнд нүүр нь улайчихсан манцуйтай чинь зууралдаад мунгинаад л сууж байна.Манцуйлж сурахаар нь үнсэлтээр шагнана гээд амалчихсан хэхэ.

2014.05.15 : Өдрийн тэмдэглэлээ хөтлөлгүй их удчихсан байна шүү.Ажил эхэлчихсэн болохоор ядраад унтчихаад байх юм.Өнөөдөр зориуд босч сууж байгаад нэг зүйлийг бичихийг хүслээ.Чамайгаа том болсон хойно оо үүнийг үргэлжлүүлэн хөтлөнө гэж ээж нь найдаж байна.Чи ч гэсэн цаг нь ирэхээр эх хүн болно шүү дээ.

2032.05.21 : Сайн байна уу ээжээ ? охин нь мэндчилж байна.Сая хуучин агуулах аа цэвэрлээд онгичиж байхдаа хөөрхөн зурагтай дэвтэрийг сонирхоод нээсэн юм л даа.Тэгтэл таны бичиж эхлүүлсэн тэмдэглэлийг олоод уншчихлаа.Тэгнэ ээ охин нь үргэлжлүүлэн бичнэ, дуустал нь хөтлөөд тандаа гэнэтийн бэлэг барина аа.

2032.06.11 : Үдшийн мэнд ээжээ ааваа.Та 2 нөгөө өрөөнд миний төрсөн өдрийн бэлэгний талаар нууцаар зөвлөлдөж байх хооронд би өөрийнхөө өрөөнд та хоёрын ирээдүйд барих гэнэтийн бэлэгийг бэлдэж байна.Тэгээд би энэхүү баавгайтай, зөгийн балтай улбар шаргал дэвтэрт “ Аз жаргалын тэмдэглэл ” гэдэг нэр өгсөн таалагдаж байна уу ? ...........................

2032.06.18 : Ямар сайхан өдөр вэ.Бүх зүйл л надад зориулагдсан мэт байлаа.Хөдөө нутгийн хол газраас хар багын минь найзууд минь хүртэл хүрэлцэн ирж тэнгэрээс нар хүртэл бороогоор бэлэг барьсанд би маш их байртай байна.Мөн та хоёр минь надад жижигхэн хөөрхөн гөлөг бэлэглэсэн.Буржийж бондойж бүлтийчихээд үнэхээр эгдүйтэй.Би майзаг гэж нэр өгсөн том болоод надад уурлах болов уу ? магадгүй л юм.

2032.11.19: Майзаг бүр л инээдтэй болоод байх юм.Тэнэг царайлчихаад намайг маш сайн ойлгодог.Байнга дэргэд минь байж би ганцаардахаа больсон.Та хоёртоо дахин дахин баярлалаа.

2032.12.09: Удахгүй шинэ жил болох гээд нэг л догдолчихсон байна аа.Телевизээр хүртэл цасан ширхэг будраад л цаанаа л нэг сэтгэл хөдлөм.Аав гэрээ үнэхээр мундаг чимэглэсэн ямар ч дизайнераас илүү.Харин ээж минь хамгийн амттай шинэ жилийн амттанг бэлдэнэ дээ.

2032.12.19 : Манайхаар зочилсон найзууд маань миний ёолкон дээр хүслээ бичиж өлгөж байгаа.Би ч бас бичсэн, оддод хүртэл шивнэсэн.Бас энэ дэвтэртээ бичмээр байна.” Би зураач болмоор байна ”.

2032.02.06 : Цагаан сарын шинийн гурван.Сайхан шинэлцгээж байна уу ? хэхэ.Охин нь мэндчилгээний үг мэдэхгүй өвөөдөө зэмлүүлсэн ч дараа нь надад зөндөөг зааж өгсөн.Харин Майзаг гуай хойд хөлөн дээрээ зогсож байгаад хүүхдүүдтэй золгоод байсан.Ёстой л “амьдралын гол дүр” байлаа.Миний найз ухаантай нохой шүү.

2032.02.14: Өнөөдөр гэгээн валентины өдөр.Сургуулиас гэртээ ирэх замд нэг өвөө ганц улаан сарнай гартаа чанга атгачихсан яаарч явахтай таарсан.Ганган костюм, гялалзсан гутал нь сайхан харагдаж байсан ч хэнээс ч дулаахан инээмсэглэл хайртдаа тэмүүлсэн сэтгэл хоёр нь хүүхэд насандаа очсон мэт л харагдуулж байсан.Охин нь гэртээ ирэхэд та хоёр эзгүй байлаа.Тэгэхээр нь би жазз хөгжим, лаа дарстай ширээ бэлдээд орхичихсон шүү.Таалагдсан уу хосуудаа ? =)

2032.07.01: Аав аа, ээж ээ ! охин нь чадчихсан шүү дээ гэж хашхирч байснаа л санаж байна.Хүссэн мэргэжлээ авах ямар сайхан юм бэ.Би удахгүй уран зургийн ангид шинэхэн танилууд дундаа сууж байх болно.Баярлалаа аав аа ээж ээ ! одод оо!, ёолк оо!.

2032.09.01: Өнөөдөр хичээлийн эхний өдөр үнэхээр ер бусын байлаа.Бүгд надтай адилхан хүсэл мөрөөдөлтэй гэхээр цаанаа л нэг дулаахан мэдрэмж төрж байсан.Нэгэн том хөлөг онгоцон дээр олуулаа суугаад урлагын хязгааргүй далайгаар хөвөх мэт.Охин нь хичээх болно оо.Хайртай !

2032.11.19: Оюутан байна гэдэг их хичээл чармайлт шаарддаг бололтой.Охин нь их завгүй байх болсон.Оюутаны зөвлөл, уран зураачдын бүлэг, мөн шинэхэн найзуудын уулзалт, үзэсгэлэн, гэрийн даалгаварууд гээд л...Манай багш их мундаг хүн.Багш гэдэг хүний мөн чанардыг тэр хүнээс л мэдэрч байна аа.Тэр хүн бүрийн бодол, хэв маягыг хүндэлж түүнийг нь хөгжүүлэхийн төлөө заадаг.Өөрийн гэсэн өвөрмөц зураглалтай, уран зургийн талаар асар их мэдлэгтэй ч түүнийгээ бусдад тулгадаггүй, харин ч найз шиг байдаг нь надад их таалагддаг.Би энэ ангид л орох ёстой байснаа ухаарсан.

2033.02.18: Ээж ээ охин нь та хоёр оо бас майзаг аа маш их санаж байна шүү.Амралт эхлэхээр дэгдээд очно оо.Зөндөө үнсэлт, тэврэлт ээ хадгалж байгаад гэрлийн хурднаас ч хурданаар харваад очно.

2033.09.01: Шинэ оройн мэнд.Ээжээ охин нь амралтаар гэртээ харихдаа яараад хамгийн хайртай тэмдэглэлийн дэвтэр ээ хүртэл мартаж орхиж.Ямар их аз жаргалтай байснаа тэмдэглэж чадсангүй, ирээд л бичиж сууна.Өнөөдөр найзуудаа бас планшет бийр, харандаагаа их санаснаа мэдэрлээ.Тэгээд эхний зурагаа зурах гэж байгаадаа догдлоод л сууж байна.Сэдэв нь “Аз жаргалтай гэр бүл”.

2033.10.13 : Оройн мэнд.Сайн байна уу хайрт ээж аав хоёр минь...охин нь өнөөдөр жаахан оройтчихлоо.Учир нь нөгөө ангийн Төгөлдөр намайг болзоонд урисан юм л даа.Тэр их хөөрхөн ааштай, нямбай, урлагын өвөрмөц мэдрэмжтэй залуу байдаг юм.Надад л таалагддаг байх гэж бодож байтал өнөөдөр түүнээс захиа ирээд түүнийг нь задлаж суухдаа юу гэж байгаа бол гэхээс маш их догдолж байлаа.Гэтэл надад хайртай, бас намайг л хайж байж гэсэн.Тэгээд өдөр нь болзоонд уриж орой гэрт минь хүргэж өгсөн.Миний дотор ямар нэгэн сайхан зүйл орчихоод тэр нь намайг гижигдээд байгаа юм шиг мэдрэгдэж байна.Догдлоод л, инээмсэглээд л, орилмоор ч юм шиг, үсэрмээр ч юм шиг...

2034.03.07: Өглөөний мэнд миний хайртай гэр бүлийнхэн минь.Удаан бичсэнгүйд уучлаарай.Учир нь эдгээр өдрүүдэд охин нь үүлэн дээр л хөвж явлаа.Харин намайг гарнаас минь атгаад хөвөхөд тусалсан залуу хажууд нойрсож байна.Түүнийг минь Төгөлдөр гэдгийг та 2 мэдэж байгаа байх.Бид хоёр хамтдаа үргэлж байх болсон.Хамтарч үзэсгэлэн гаргасан, хамарч ном гаргасан, хамтдаа ирээдүйнхээ талаар мөрөөдөх болсон.

2034.05.01 : Ээжээ...хайрт ээж минь...охин нь энэхүү аз жаргалтай мэдрэмжээ юу гэдэг үг, үсгээр илэрхийлэхээ ч мэдэхгүй байна.Танд ч гэсэн энэ мэдрэмж төрж байсан гэхээр та ойлгох байх.Миний дотор миний хайрт бид хоёрын үргэлжлэл, хайрын ургамал минь байна.Саяхан мэдээд тандаа хамгийн түрүүнд хэллээ.Энэ ертөнц надад дөрөв дэхь гайхалтай бэлэгээ бэлэглэлээ.Эхнийх нь та хоёр минь дараагынх нь миний хамгийн сайн найз майзаг, гурав дахь миний хайрт дөрөв дэхь миний хүүхэд.

Ингээд л орхихоор шийдлээ.Энэ хүмүүс гэдэг эмэгтэй хүнээс л үүдэлтэй шүү дээ.Харин эмэгтэй хүн гэдэг дотроо олон янз.Тэр олон янзын хамгийн хүлцэнгүй, үнэнч, ухаалаг, халамжтай, энэрэнгүй, гэгээлэгт нь миний ээж ордог юм.Үргэлж байгаагаараа л байж өмнөх ажилдаа өөрийгөө зориулдаг, гоёл зүүлтээсээ илүү инээмсэглэлээрээ өөрийгөө чимдэг.Залуудаа ямар үзэсгэлэнтэй, сайхан байсанг нь би жаахан байсан ч тодоос тод санадаг юм.Харин одоо тэр үеээс нилээн өөрчлөгджээ.Ээжийн минь гар өвлийн жавар зуны халуунд гэрээн бүлээцүүлж ногоогоо хураах гэсээр хөрс усанд хатуурч эвэршээд, ханийхаан л аясаар хөлөөн жийж хөнжлөөн нимгэлсээр турьхан сайхан нуруу нь бөгтийж, хүмүүсийн хооронд эвийг нь олох гэж сандачин хүүхдийнхээ хойноос хөл нь гүйцэхгүй бүдэчсээр нүдэнд нь үрчлээ сууж, нүүрэнд нь гуниг хурчихаж.Гэхдээ надад хүрэхэд гар нь яг л урьдийн хэвээрээ ямар зөөлхөн, яг л дөнгөж төрсөн хүнийх шиг булбрайг мэдэрч нүд нь орь залуугаараа инээмсэглэж байгааг хардаг юм.Өдийг хүртэл хүнд бэрхийг туулж хүүхдийнхээ төлөө л хүслээ хүлж хамаг бурууг өөртөө үүрсэн ээж та ямар өөдгүй хүн бэ? хааяа ч гэсэн амиа бодож хүүхдээ хэсэг мартаж бай л даа.Төрүүлж өгсөн, төлөвшүүлж хүн болгосон түүнээс ихийг таниас би яаж нэхэх юм бэ ? авч зүрхлэх юм бэ ? Бусдын төлөө өөрийгөө золин, өрөөлд өгсөн жаргалынхаа өмнөөс сэтгэл зүрхээрээ баярлаж суудаг бүсгүй та жинхэнэ амьд бурхан гэлтэй.Хүү нь тандаа хайртай гэж хааяа л хэлдэг ч дотроо үргэлж уншиж явдаг юм шүү.