Г.Буяндоржийг Дарханы төмөрлөгийн үйлдвэрт мөнгө угаасан хэргээр шалгаж эхэллээ

2013-08-20

“Ноёд” группийн ерөнхийлөгч Г.Буяндоржийг цагдаагийнхан эрж сураад байсан чинь

өнгөрөгч баасан гарагт бариад хорьчихож. Нийслэлийн прокурорын газрын Эдийн засгийн гэмт хэрэгтэй тэмцэх хэлтсээс түүнийг бусадтай бүлэглэн онц их хэмжээний мөнгө угаасан хэргээр шалгахаар болсноо зарлав. Энэ хэрэгт холбогдуулан Дарханы төмөрлөгийн үйлдвэрийн Эдийн засаг, худалдаа хариуцсан орлогч захирал М.Сайннямбуу, ерөнхий нягтлан бодогч Д.Даваадорж нарыг мөн шалгаж эхэлсэн байна. Г.Буяндоржтой холбоотой хэргийг шалгаж эхлэхэд мөрдөн байцаалтын явцад оргон зайлсан, ор сураггүй болсон гэж үзээд эрэн сурвалжилж, олдохгүй болохоор нь гэрийнх нь үүдэнд хүртэл зарлан дуудах хуудас наасан гэнэ. Энэ сарын 13-ны 10:00 цагт НПГ-т ирэхийг уг зарлан дуудах хуудсаар мэдэгдсэн ч Г.Буяндорж ирээгүй учраас түүнийг өнгөрөгч баасан гарагт баривчилсан нь тэр аж.

“Ноёд” группийн захирал Г.Буяндоржийг Дарханы төмөрлөгийн үйлдвэрт мөнгө угаасан байж болзошгүй хэрэг нь иргэний гомдлын мөрөөр шалгагдаж эхэлж байгаа бөгөөд үнэн эсэхийг нь хэлэхэд арай эрт байна. Эх сурвалжийн мэдээлж буйгаар энэ хэргээр шалгуулж байхдаа мөрдөн байцаалтаас оргосон гэх. Г.Буяндорж Өвөрмонгол найзтайгаа нийлж, Хятадын “Тайшин” компанитай хамтран ажиллахаар болсон нь 2011 он. Тус компани Дарханы төмөрлөгийн үйлдвэр төрийн өмчит компаниас төмрийн хүдрийн баяжмал авах зорилготой гэрээ байгуулжээ. Энэ ажлыг Г.Буяндорж хариуцаж “Тайшин” компанийн Монгол дахь төлөөлөгчөөр ажиллахаар болсон аж. Нийтдээ 100 мянган тонн төмрийн хүдрийн баяжмалыг тонн бүрийг нь 40 ам.доллараар авах гэрээг хоёр компанийн удирдлагууд хийсэн байна. Энэ бол дөрвөн сая ам.долларын гэрээ байв. Урьдчилгаа мөнгө болох хоёр сая ам.долларыг 2011 оны тавдугаар сард Хятадын тал Дарханы төмөрлөгийн үйлдвэрийн дансанд шилжүүлсэн байдаг. Гэвч төмрийн хүдрийн баяжмал өмнөд хөрш рүү ачигдсангүй. Сарын дараа гэхэд дээрх хоёр сая ам.долларын 1.2 сая нь байгуулагдаад ганцхан сар болж байсан “Скай Тауэр Энх Буян” гэдэг компанийн дансанд орчихсон байсан нь Хятадын талыг “шоконд” оруулжээ. Сүүлд энэхүү компани нь “Ноёд” группийн охин компани болж таарсан байна. Монголын төрийн өмчит компани хувь хүнтэй нийлж мөнгө угаасан хэрэг ийнхүү шалгагдаж эхэлжээ.

Бас үүн дээр нэмээд “Зоос” банкнаас авсан гэх 100 сая төгрөгийн хэрэг, “Цэн трейд” компанийн нэхэмжлэлтэй дөрвөн тэрбум 121 сая төгрөгийн хэрэг, төрийн албан хаагчид авлига өгсөн хэрэг гэхчлэн үргэлжилж буй.

2004 онд Г.Буяндорж “Зоос” банкнаас “Да Мон Трейд” компанийн тамга, тэмдэг, гарын үсгийг хуурамчаар үйлдэж, зээл авсан байна. Залилангийн шинжтэй энэхүү томоохон үйлдлийг нь шалгуулахаар “Да Мон Трейд” компанийн захирал УМБГ-т хандсан боловч тодорхойгүй шалтгаанаар хэрэг үүсгэлгүй орхисон байдаг. Энэ хэргээс өмнө 2002 оны үед мөн л Г.Буяндоржид холбогдох “Цэн трейд” компанийн нэхэмжлэлтэй хавтаст хэрэг нээсэн гэх боловч мөн л үнэн худал нь тодроогүй. “Цэн трейд” компанитай хамтран ажиллах гэрээ байгуулсан Г.Буяндорж өөрийн охин компаниараа дамжуулан ихээхэн хэмжээний зээл авч, төлөөгүй гэх дөрвөн тэрбум 121 сая 806 мянган төгрөгийн асуудлаар шүүхэд дуудагдсан нь тэр байжээ.

Түүнчлэн “Ноёд” групп архи, шар айрагны онцгой албан татварын тайланд тусгалгүйгээр онц их хэмжээний буюу 277 сая 158 мянган төгрөгийн татвараас зайлсхийсэн, Дархан-Уул аймгийн Цагдаагийн хэлтсийн хоёр мөрдөн байцаагчид хахууль өгсөн хэргээр шалгагдаж дуулиан тарьж байлаа. Хан-Уул дүүргийн шүүх, улсын яллагч Ё.Сагсай бусдад 10 сая төгрөгийн хахууль өгсөн хэрэгт нь Эрүүгийн хуулийн 269.2-т зааснаар хоёр жил, онцгой албан татвараас зайлсхийсэн хэрэгт нь, нотлох баримтаар Эрүүгийн хуулийн 166.2-т зааснаар зургаан жил, нийтдээ найман жилийн хорих ялын дүгнэлт үйлдсэн бөгөөд шүүх хэргийг хэлэлцээд 5.6 жил хорихоор зүйлчилсэн байдаг. Гэвч давж заалдах шатны шүүх хурлаар энэхүү хэргийг хэрэгсэхгүй болгосон юм. Харин түүнээс хахууль авсан гэх хоёр мөрдөн байцаагч болох Д.Бямбадорж, Д.Саруул нарыг тус бүрт таван жилийн хорих ял өгч, хоёулангаас нь таван сая төгрөг гаргуулан улсын орлого болгосон байдаг. Ийнхүү төр засаг ээлжлэн солигдож, “Ноёд” группын захирал Г.Буяндоржийг “өршөөн хэлтрүүлсээр” иржээ. Харин одоо түүнд Монголын хууль, шүүх хэрхэн хандахыг харцгаая.

Б.Оюунгэрэл

Г.Буяндоржийг Дарханы төмөрлөгийн үйлдвэрт мөнгө угаасан хэргээр шалгаж эхэллээ
Tweet
Bolod.mn

Сэтгэгдэл (2)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
ариунаа б********ай авгайтай таарсан таар шуудай

2013-08-20 | 12:18:16 | 203.91.119.99 |

Зочин
монго угаах биш з********илангийн х********д байна.Энэ хун зугээр л луйварчин байна шуудэээ.Хуний гарийн усгийг дуурайлгаж зураад монго авчихдаг ёстой тэнэг гар ,дараа н баригдаж л таараа шуу дээ,ха ха ,******** н хатаа

2013-08-20 | 12:17:17 | 203.91.119.99 |