2013-07-23

Хав дөрвөлжин цээжтэй, ханагар сайхан залуу гэж яригддаг Монгол Улсын 21 дэх аварга Г.Эрхэмбаяртай

ярилцлаа. Жинхэнэ гүндүүгүй Монгол эрийн дүр төрх, төвшин амгалан зан чанартай түүнийг Монгол Улсын аварга болсонд наадамчин олон тун ч баяртай байна. Сайхан аваргын тань элдэв хачиргүй ярилцлага танд таалагдах болно.  

 

  -Монгол Улсын аварга хэмээх хүндтэй цол хүртэж, наадамчин олноо баярлуулсан танд баяр хүргэе. Баярын мэндчилгээ цуварсаар л байгаа биз дээ?

-Ардын хувьсгалын 92 жилийн ойн баяраар олон түмнийхээ итгэлийг алдалгүй энэ сайхан цолыг хүртсэндээ баяртай байна.

Нутгийн маань зон олон түүхэндээ нэг аваргатай болчих юмсан гэсэн хүсэл эрмэлзлийг 2011 онд намайг арслан болсон цагаас тээж эхэлсэн. Нутгийн удирдлагууд, настангууд, нутгийн зон олон маань аварга болоорой гэж захидаг байлаа. Тэр захиасыг биелүүлсэндээ баяртай явна. Баярын мэндчилгээнүүд цуварсаар байна.  

-Жил болгон нэг нь түрүүлж, аварга, арслан цолонд хүрдэг. Гэхдээ энэ жилийн аваргадаа хүмүүс сэтгэл ихэд дүүрэн байна. Учир нь таныг аварга болчихоосой гэж Монголын ард түмэн нийтээрээ хүсэн хүлээж байж. Ерөөс талцаж, нутгархахсангүй. Та тийм л түмний хайртай бөх юм байна шүү дээ?

-Ер нь их баярлаж байгаа нь мэдрэгдсэн. Цэнгэлдэхэд уухайлж байгаа тэр их түрлэг, түмний хэлж ярьж байгаа буянтай ерөөлүүд нь сайхан санагдсан. Түмнийхээ энэ их хайр хишгийг дааж, итгэлийг нь алдахгүйн төлөө зүтгэнэ ээ.

-Уг нь сайн судалбал та Завхан гаралтай хүн юм билээ. Аав, ээж тань Завханыхан шүү дээ. Тэгэхээр энэ наадмыг завханыхан манлайлчихсан юм биш үү?

-Тийм ээ, манай аав, ээж Завхан аймгийн Баянхайрханы уугуул. Гэхдээ ажил, амьдралын гараагаа Сэлэнгэ аймгийн Мандал суманд эхлүүлж, үр хүүхэд биднийгээ төрүүлж өсгөсөн.

Аав минь ч амьд сэрүүн байхдаа Сэлэнгэ аймгийн Мандал сум гэж дуудуулж, овоглуулж яваарай гэж захисан. Аав, ээж минь энэ сайхан нутагт төрүүлж өсгөөгүй бол би гэдэг хүн ямар ч байдалтай явж байх юм билээ гэж сая нутагтаа очиход омогшиж, баярлаж байлаа.

-Дараа жилийн наадам хүртэл энэ жилийн бөхийн барилдаан ярих зүйл ихтэй боллоо. Хэрэв хоёр жилийн өмнөх үйл явдал давтагдаж, С.Мөнхбат аварга та хоёр үзүүр, түрүүнд үлдсэн бол ямар барилдаан гарах байсан бол?

-Ер нь С.Мөнхбаттай л үзүүр, түрүүнд үлдэх байх гэж бодож байсан. С.Мөнхбаттай олон жил барилдлаа, сайхан барилдчихъя гэж бодож байлаа.

-Даагаа нэхнэ гэж бодсон уу, үгүй юү?

-Надад тийм хор шар байгаагүй ээ. Өнгөрсөн хоёр жилийн хугацаанд нутгийн удирдлага, зон олон маань “Сэлэнгэ аймагт арслан байгаагүй биш байсан, харин аваргатай болчихвол зүгээр юм даа” гэж хэлдэг байсан болохоор сэтгэлзүйн хувьд бэлтгэлтэй байсан.

Ер нь төрийнхөө баяр наадамд түрүүлж үзье гэсэн бодол байсан болохоос биш даагаа нэхнэ, тэрэнтэй тэгж барилдана гэсэн хор шар байгаагүй.

-Түрүү бөхийн од нь гийчихсэн, цаанаа өөр байдаг гэдэг. Танд өөрт тань хэр мэдрэгдэж байв. Энэ жилийн наадам минийх болно гэсэн итгэл байсан уу?

-Тийм зүйл байгаагүй. Арслан гэдэг өөрөө бага цол биш. Арслан байтугай заан цолыг би олон жил мөрөөдөж, олон жил хөдөлмөрлөсөн. Заан цолтой болох мөрөөдөлдөө хүрэхийн тулд бэлтгэлээ арай өөр хийж байж дээ гэж одоо бодогддог. Нэг ёсондоо заан цолонд хүрэх мөрөөдлөө би давуулан биелүүлсэн гэж болно.

Энэ дашрамд Элбэг багш, Нарангэрэл багш, хүчний бэлтгэлийн Эрхтөр багшдаа их баярлаж явдагаа хэлье. Би өөрийгөө их азтай гэж боддог юм. Учир нь над шиг гурван багштай бөх монголд бараг байхгүй дээ. Багш нар маань том цолтой шавьтай болчих юмсан гэж намайг бага залуу байхаас өөрсдийн эрдэм чадлаа сэтгэлээрээ зааж ирсэн. Гурван багштай хүн чинь сайжрахгүй ч гээд яах билээ, тийм ээ.

-Тэгэлгүй яах вэ. Хав дөрвөлжин, шкаф шиг цээжтэй болсон нь 320 кг жингийн штанкийг гурван цагийн турш өргөдөгтэй тань холбоотой байх. Таныг тэгж их хичээж, бэлтгэлээ хийдэг гэж дуулсан?

-Багш нарын маань хичээл зүтгэл их нөлөөлсөн. Мөн манай Сэлэнгэ аймгийнхан өөрсдөө их хөдөлмөрч хүмүүс. Энэ сайхан хөдөлмөрч хүмүүсийн дэргэд өсч хүмүүжсэн нь хөдөлмөрч, хичээнгүй болоход сургасан байх.

 Манай Сэлэнгэ аймгийн Мандал сумын айл болгон хашаандаа ногоо тарьдаг, мал аж ахуйгаа эрхэлдэг. Хүн хөдлөхгүй бол тэр ногоо үржиж, мал арвижна гэж байхгүй. Бусад аймгийнхныг үгүйсгэж байгаа юм биш. Тэгэхдээ л Сэлэнгийнхэн их хөдөлмөрч хүмүүс. Тэднээс би хөдөлмөрч, хичээнгүй байдлыг суралцсан.

-Таны хав дөрвөлжин цээжин дор орсон бөх гарч чаддаггүй гэдэг. Цээжин дороо л хийгээд авбал та “тас” юм биш үү?

-Тодорхой хэмжээний техник, тактик байдаг л байлгүй дээ.

-Одоо та жин хэдтэй байна вэ?

-145 кг жинтэй.

 

Би амлаж , амлуулж ч явсан, Б.Соронзонболд шиг зантай хүн хараагүй

 

-Хөөх, лут юм байна. Ингэхэд наадмын тавын даваанд та Б.Соронзонболд заантай таарсан. Таныг цохиод авч байгаа харагдсан. Харин та тэвчээд л өнгөрнө лээ. Б.Соронзонболд заан наадамчин олонд эвгүй сэтгэгдэл үлдээсэн шүү?

-Б.Соронзонболд залуу хүний уур омгоор л тийм байдал үзүүлсэн байх. Гэхдээ үндэсний бөхийн цол эрэмбийн утга учир нь нэгнээ амлаж, амлуулж барилдахад  байдаг. Харин манай зарим нэг залуучууд хүлээцгүй, омогтой байгаа нь эвгүй  санагдсан.

-Б.Соронзонболд өөрөө ч бас таныг амлаж барилдаж байсан цаг бий байх аа?

-Б.Соронзонболд заан болчихоод намайг начин байхад амлаад барилдаж байсан. Тэглээ гээд би уурлаж байгаагүй.

Ер нь бол бид их азтай хүмүүс юм. Дээд үеийн тэр сайхан ёс жудагийг бүр мөсөн алдагдчихаагүй байхад бөхийн спортод орж, энэ дэг журам дор хүмүүжсэн. Одооны залууст энэ дэг жаяг жаахан алдагдчихаад байна уу гэж анзаарагдаж байгаа учраас МҮБХ уг асуудалд тулж ажиллана биз ээ.

-Ёстой л бөхчүүдийнхээ ус жудагийн асуудалд тулж ажиллах цаг нь болжээ. Б.Соронзонболдын хувьд танд уналаа гэж уурлаж байгаа юм уу, эсвэл өөрийг нь амлаж авлаа гэж омогтсон юм уу?

-Амлалаа гэж уурлаж байх шиг байгаа юм. Би өөрөө амлаж ч, амлуулж ч явсан. Тийм зан характертай хүн харж байгаагүй. Спортод янз бүрийн сэтгэл хөдлөл байдаг л даа. Гэхдээ түүнийгээ илүүцээр гаргах нь ард түмний дургүйцлийг хүргэнэ. Бид л үндэсний бөхөө сайн сайхнаар авч явахгүй бол хойч үед маань юм өвлөгдөхгүй.  

-Ер нь бөхчүүд маань наадмын талбайг зодооны талбар, гомдол тунирхалын товчоо болгоод байх шиг. Хэрүүл маргаан хийх, уйлж унжих гээд дотоод сэтгэлийн хямралаа түмний нүдэнд ил гаргах боллоо. Аварга хүний хувьд юу гэж бодож байна?

-Үүнийг цаашдаа МҮБХ, нийт бөхчүүд маань дор дороо бодолцож, засч залруулах байх.

-Мөн зургаагийн даваанд Сайнбаяр заантай, долоогийн даваанд Оюунболдтой, наймын даваанд Батмөнхтэй, үзүүр түрүүнд Гончигдамбатай барилдлаа. Хамгийн сэтгэл түгшээсэн бөх нь хэн байв аа?

-Үндэсний бөх хөгжлийн дээд цэгтээ хүрчээ. Хүн болгон бэлтгэлээ яг ажил болгож базаадаг болсон байна. Гурвын даваанд ам авахад л шижигнэсэн сайхан залуучуудаас шилж, сонголт хийх болсон. Гарын үзүүрээр би энийг ингээд аваад барилдчихад болох юм байна гэж нүдэнд олзлогдсон хүн байгаагүй. Ер нь л заал, танхимын барилдаанд сайн барилддаг сайхан залуучууд байна лээ. Дөрвийн даваанд ч аварга арслангуудтай заалны барилдаанд үзүүрлэж, түрүүлдэг аймгийн арслан цолтой бөхчүүд таарч байх жишээтэй. Энэ нь үндэсний бөх сайхан хөгжсөнийг харуулж байна.

 -Ер нь энэ жилийн наадмын таавар их эвдэгдлээ. С.Мөнхбат аварга, Н.Бүрэнтөгс арслан, Х.Мөнхбаатар арслан, Ч.Санжаадамба заан, Ц.Соднодорж харцага, Бат-Эрдэнэ гарьд, Н.Ганбаатар гарьд гээд л сайн бөхчүүд хол барилдаж чадсангүй. Тааварт яригдаж байсан хүмүүсээс та л үүргээ биелүүллээ. Ер нь бөхийн шинэ үе ирээд байна уу даа?

-Бөхийн шинэ үе гарч ирж байгаа юм байна даа гэж бодогдсон. Х.Мөнхбаатар бид нэг үеийн бөхчүүд. Харин одоо 20-той хүүхэд хүртэл улсын харцага цол хүртэж байгаа нь бөхийн шинэ үе гарч ирж байгааг илтгэж байна.

 

Аймгийн цолтонгуудыг авах боломж байсан ч гэлээ ер нь больё доо гэж бодогдсон

 

-Таныг аймгийн цолтой бөхчүүдийн зовлонг их сайн ойлгодог гэх юм билээ. Доошоо цолтой бөхчүүдээс илүү дээшээ цолтой бөхчүүдийг сонгож барилдах сонирхол танд байдаг юм болов уу гэж бодогдсон. Энэ үүднээсээ та их зөөлөн хүн шиг ээ?

-Манай Сэлэнгэ аймгийнхан дээрээсээ татлаа, түтлээ гэчих том бөхчүүдтэй байгаагүй. Улсын ганц нэг начингууд байдаг ч гэсэн тэд маань арай л жулдаад байдаг байлаа. Энэ ч утгаараа манай Сэлэнгийн бөхчүүд бор зүрхээрээ явж ирсэн. Би ч гэсэн өөрөө цол авах гэж өвдөг чичрээд явж байсан үе бий. Тэр болгоныг анзаарч, мэдэрч байхад аймгийн цолтонгуудыг зовлон их. Энэ жил аймгийн цолтонгуудыг авах боломж байсан ч гэлээ ер нь больё доо гэж бодогдсон.

-Ноднин та бас начны таваанд улсын цолтой бөх авч барилдсан байх аа?

-Би улсын арслан болсноосоо хойш хоёр дахь жилдээ барилдлаа. Ноднин бас улсын начин Нямсүрэнг авч барилдсан. Ер нь ч энэ нь зөв юм билээ. Эс бөгөөс цолны даваан дээр аймгийн цолтой бөхийг аваад барилдчихаар  нөгөө найраа гэх эвгүй ярианд орчих гээд байдаг. 

-Найраа гэдэг зүйл үнэхээр байдаг юм уу. Гэхдээ бөхчүүд хэзээ ч байдаг гэж хэлж байгаагүй л дээ?

-Бөхчүүд бид тансаг амьдралтай хүмүүс биш. Хэн нэгэнд олон саяар нь өгөх мөнгө байхгүй ээ. Аймгийн цолтой нэг бөх хамаг амьдрал, ар гэрээ хаян байж арай хийн улсын цолонд хүрэхэд найрааны начин гэх мэтээр цоллоод байвал урам зоригийг нь мохооно шүү дээ.

-Түүнээс гадна Г.Өсөхбаяр аварга Н.Түвшинбаярт тахимаа өгсөнийг та хэрхэн харж байсан бэ. Уг нь бууж өгсөн, буулгаж авсан хоёр өөдөлдөггүй гэдэг яриа бий. Тэр жил Б.Бат-Эрдэнэ аварга Б.Гантогтоход, А.Сүхбат аварга өөрийн шавь Амгаланбаатартаа тахимаа өгч байсан санагдана. Тэр цагаас хойш тэдний хэн хэнийх нь барилдаан өөдлөөгүй гэх юм билээ?

-Г.Өсөхбаяр аваргын яриа, Н.Түвшинбаяр аваргын ярилцлагыг ч сонссон. Энэ үүднээсээ Г.Өсөхбаяр аварга зөв зүйтэй зүйл хийсэн болов уу гэж бодож байна. Яагаад гэвэл Н.Түвшинбаяр аварга Монгол эх орныхоо нэрийг тив дэлхийн тавцанд гаргасан хүн. Монгол хүн хөдөлмөрлөж чадвал ямар ч амжилтанд хүрч болдогийг залуустаа харуулсан. Ийм мундаг хүн үндэсний бөхийн спортдоо эргэж ирсэнд Г.Өсөхбаяр аварга баярласан байх. Бид бүгд ч баярлаж байсан.

-Тэгэхдээ бууж өгнө гэдэг бөх хүний хийморийг унагадаггүй юм уу. Барилдах л гэж наадмын талбай дээр гарч ирчихээд тахимаа өгөөд, эсвэл найраанд ороод байвал утгагүй шүү дээ?

-Яах вэ. Энэ асуудал хүн хүний өөрийнх нь шийдвэр. Ер нь бол нутаг усны бөхөө дэмжих, ах дүү төрөл садангаа улсын цолонд хүргэх гээд олон шалтгаан байдаг. Энэ бүхнийг мөнгөтэй холбож харж болохгүй.

 

Найраа хийлээ гэж хардуулж, сэрдүүлж л явлаа

 

-Та тухайлбал барилдааных нь замыг засах гэх мэтээр тахимаа өгсөн удаатай юу?

-Надад тийм явдал байхгүй. Би найраа хийлээ гэж хардуулж, сэрдүүлж л явлаа. Хааяа доогуур уначихаад нервитээд явж байхад чамайг найраанд орсон байна гэж чихэнд буухааргүй тоо хэлэхээр эмзэглэдэг юм. Түүнтэй адил олон жилийн хөдөлмөрөөрөө цол авч байгаа хүмүүст хэцүү байдаг нь ойлгомжтой.

-Тэгэхээр та бөхчүүдийн дунд найраа гэсэн асуудал байхгүй гэж хэлж байна уу?

-Би хараагүй, сонсоогүй болохоор мэдэхгүй байна. Надад лав тийм санал тавьсан удаагүй.

-Тэгвэл тань шиг үнэнч шударгаар барилдаж байгаа бөх хэд байдаг юм бол оо?

-Зөндөө бий шүү дээ.

-Мөн бөхчүүдийн бас нэг хэл ам таталдаг асуудал бол допинг. Улсын цолонд хүрсэн болон дээшээ барилдсан бөхчүүдэд сэргээшийн шинжилгээ хийхэд заавал илэрчихээд байдаг. Энэ жил гайгүй байгаа?

-Гайгүй биз дээ. Хамгийн гол нь мэдээлэл муу байдгаас манай бөхчүүд сэргээшийн асуудалд нэр холбогддог. Сургалт, семинар их явуулж баймаар юм уу. Бөхийн спорт гэдэг чинь өөрөө их эрсдэл ихтэй. Бэртэл, гэмтэл байнга авч байдаг. Бэртсэн л бол хувь хувиараа явж эмчилгээ хийлгэдэг. Спортын мэргэжлийн эмч дээр байнга очоод байж чаддаггүй учраас бусад эмч хурдан эмчлэхээ бодож янз бүрийн хориглосон бүтээгдэхүүн орсон эмчилгээ хийчихдэг шиг байгаа юм.

-Ингэхэд та Монгол Улсын 21 дэх аварга юм байна. Бас Сэлэнгэ аймаг 1921 онд байгуулагдсан түүхтэй. Уржнан буюу 78 жилийн дараа Сэлэнгээс та арслан болж байлаа. Та өөрөө 78 оных гээд ер нь дандаа билэгшээлтэй ой, жилүүдэд цолонд хүрэх юм аа даа?

- Анх Боохоо Данзан гуай 1933 онд улсын наадамд үзүүрлэж, Сэлэнгэ аймгийн анхны арслан цолтой бөх төрсөн юм билээ. Түүнээс хойш 78 жилийн дараа би арслан болсон. Би өөрөө 78 оных. Бас өнгөрсөн жил Зайсанд шинэ сууцанд ороход 78 дугаар байр надад өөрөө таарсан. Миний унадаг 3939 машины цифрийг нэмбэл 78 болно. Энэ бүхэн их билэгдэлтэй. Яг л захиалсан мэт 78 гэсэн тоо надад таараад, аз авчираад байдаг юм. Эцэг эхийн маань буян л даа.

 

Эцэг хүн үр хүүхдээ мэдэж хайрладаг юм байна

 

-Ээж, ааваа  их баярлуулсан хүн л их сайхан амьдардаг юм шиг санагддаг. Та аав, ээжийгээ үргэлж дээдэлж, сайн сайхан амьдарч байгаагаа тэдэнтэйгээ л холбож ярьдаг. Одоо аварга болоод ээжийгээ ч их баярлуулж байна?

-Эцэг хүн үр хүүхдээ мэдэж хайрладаг юм байна. Миний аав намайг ямар ч буруу зүйл хийсэн хорьж, хориглож, загнаж, зандарч байгаагүй. Хүн өөрийг нь хэдий чинээ хайрлана, төдий чинээгээр эргээд хариу баридаг. Би эцэг, эхдээ үнэхээр баярладаг юм. Намайг эрүүл саруул өсгөж, юугаар ч дутаалгүй хүн болгосон. Тэд маань л миний замыг засч ирсэн. Түүнээс биш ээж, аавыгаа баярлуулж сүйд болсон юм алга. Энэ сайхан хүмүүсийнхээ буяныг төлж барна гэж хэзээ ч байхгүй.

-Тэр үнэн. Хоёр жилийн өмнө, таныг арслан болдог жил би таны ээжээс ярилцлага авч байсан. Тэр үед ээж тань “Миний одонгийн хүүхэд” гэж таныг онцолж байсан. Төрөхдөө л ээждээ одон авч ирж өгсөн хүү маань арслан болоход шанага шанагаар нь сүү өргөж, хүүгийнхээ төлөө залбирч байлаа гэж билээ?

-Манай ээж их төлөв төвшин, амгалан хүн төдийгүй олон хүнд буян хийсэн нэгэн. Ээж маань эх баригч эмч. 4000 ч гэдэг бил үү хүнийг эх барьсан гэж тоо хэлээд байдаг юм. Тэр олон хүнийг эх барьж, тэр их баяр баяслыг залуу хосуудад өгч байсан ээжийн минь буян надад ирсэн байх. Аав, ээж хоёр минь их буянтай улс даа.

-Нээрээ наадмын өмнөх орой таныг маргаашийнхаа барилдааныг бодоод нойргүй хоносон гэж байсан. Барилдааны завсраар жаахан зүүрмэглэж, дугхийж байгаа харагдсан шүү?

-Агаар салхинд бэлтгэл хийж байгаад хотод ирэхэд бүгчимдээд нойргүй хонох нь хоносон. Мэдээж сайн ханийнхаа буянд тэр болгоныг давж гаралгүй яах вэ.

Миний хань сэтгэлзүй ч, тогооч, асрагч гээд бүх л төрлийн мэргэжилтэн гэсэн үг. Ханьдаа их баярлаж явдаг даа.

-Их шавилхан эмэгтэй харагдана лээ?

-Бид намайг цол, хэргэм аваагүй, оюутан ахуй цагтаа л гэр бүл болсон. Түүнээс хойш 11 жил болж байна. Үйл хөдлөл, зан ааш, бүх л зүйлээрээ ижил дасал болчихож.

-Хань ямар байхаас хүмүүсийн амьдрал өсч, дэвжих эсэх нь шалтгаалдаг. Тэр тусмаа спортын хүний амьдрал цэвэр гэр бүлтэй нь холбоотой?

-Тэгэлгүй яах вэ. Ар гэр маань энэ спортыг ойлгохгүй, янз бүрийн байдлаар асуудал гаргавал энэ амжилтанд хүрэхгүй. Одоо бодоход өнгөрсөн 11 жилийн хугацаанд ганц бие хүн шиг явж байхад гэр бүлийн маань хүн амь амьдралыг минь авч явж, бөөцийлж ирсэн. Үүний хүчинд өнөөдөр ийм сайхан үйл явдал болж байна.

-Бөхчүүд охин хүүхэд аавдаа цол авчирдаг гэж билэгшээдэг юм билээ. Харин та Ариунзаяа, Саруулзаяа хоёр хөөрхөн охинтой юм байна?

-Тийм ээ. Би хоёр охинтой. Том охин маань арав хүрч байна. Бага нь ноднин наадмын өмнө төрсөн. Хоёр охиноо аавдаа буян заяа дуудаж дээ гэж баярладаг юм.

 

С.Баярцогт гишүүн надад Бенз G-500 бэлэглэсэн, хараахан номероо аваагүй байна

 -Сониноос бэлгийн хур зөндөө бууж байна уу?

-Буусаан.

-Арслан болдог жилийнх нь амласан бэлгээ зарим хүмүүс өгөөгүй л гэх юм. Тухайлбал Г.Буяндорж танд Зайсанд таван өрөө амлачихаад өгөөгүй гэдэг үнэн үү?

-Нутаг орныхоо буянтай улсууддаа их баярлаж байна. Би төрийн наадамд 16 дахь жилээ барилдаж байна. Энэ сайхан хөдөлмөрийг маань нутгийн ах дүү нар маань үнэлж байгаад баярладаг.

Буяндорж ах маань намайг залуу байхаас авахуулаад дэмжиж, улсын цолонд хүрэхэд маш их нөлөөлсөн. Эцгийн маань оронд эцэг болж байгаад Буяа захиралдаа баярлаж явдаг. Хүнтэй нөхөрлөчихөөд ашиглаад хаядаг хүн биш.

Буяа захирал маань надад таван өрөө байр амласан. Байр маань арай ашиглалтанд ороогүй юм билээ.

-Энэ жил танд Бенз G-500 машин, бас гурван өрөө байр бэлэглэсэн байна лээ. Бэлгүүдээ авсан уу?

-С.Баярцогт гишүүн надад Бенз G-500 гэж машин бэлэглэсэн. Хараахан номероо аваагүй байна. Бас “Мон Дэ” компанийн захирал Түмэндэлгэр гурван өрөө байр бэлэглэсэн юм.

-Удахгүй наадмаа хийнэ гэсэн байх аа?

-Манай нутгийн удирдлагууд ярилцаад аваргынхаа аварга цолны бэсрэг наадмыг хийнэ гэж төлөвлөөд байна. Танай сэтгүүлээр дамжуулаад бөхчүүд, уяачид, сурчидыгаа аварга цолны маань бэсрэг наадамд ирж, нэг өдрийг сайхан өнгөрөөгөөрэй гэж урья.

С.Бэлэгмаа

Эх сурвалж: Инфо тв сэтгүүл