"Моханик"-ийн адтай залуус хаана байна аа, гадаадад гарав уу хамтлаг тарчихав уу гэж сураглах хумүүс байна. Тэднийг хөөрхөн залуус ч гэнэ. Тэд эх орондоо байхаар барахгүй, шинэ уран бүтээл хийгээд тун завгүй явна. Эдний дуучин Цоожоо (С. Цогт)-той холбогдон, ярилцлагад урьж ийн хөөрөлдсөн юм.

-Нэр чинь Цогт байдаг, гэтэл хүмүүс Цоожоо гээд байх юм. Буруу цээжилснээс болоод ингэж нэрлээд хэвшчихэв үү?

-Манай арван жилийн ангийн найз надад ийм хоч өгчихсөн юм. Цогтоо нэртэй хүн олон болохоор би өвөрмөц нэртэй байх зүгээр юм уу гээд энэ хочиндоо дуртай болсон.

-Сонсогч, фэнүүд тань та нарыг мартахаа шахсан гэж бодохгүй байна уу?

-Мартагдмааргүй л байна шүү дээ (инээв). Удахгүй шинэ уран бүтээлээр уулзахаар бэлтгэж байна.

-Хэзээ?

-Тун удахгүй.

-Шинэ уран бүтээл нь мэндлэхийн босгон дээр танай хамтлагийн тухай, өөрийн чинь санаа бодлын талаар ярилцъя гэж бодлоо. Цоожоо яагаад хамтлагт нэгдэх болсон бэ. Яагаад заавал "Моханик"-т гэж?

-Цаанаасаа зурсан байх гэж боддог. Бид бүгд нэгдүгээр ангиасаа хамт явсан хүүхдүүд. Нэг ангийн зургаан хүүхэд энэ хамтлагийг байгуулсан. Бид анхнаасаа Монголын ууган сургууль нэгдүгээр арван жилийн нэг ангийн нэг ангид орж таараагүй бол би л лав өнөөдөр юунд дуртай, ямар үзэл бодолтой хүн байх байснаа төсөөлж чаддаггүй юм. Тийм болохоор сонголтыг хийсэн аав ээж нартаа үнэхээр баярлаж явдаг.

-Танай аав, ээжүүд хамтлаг болгож нэгггэж өгсөн гэж ойлгож болох нь. Тэднийг танай хамтлагийн продюсерууд гэж болох юм биш үү?

-Бараг л. Энэ хамтлагт орсон минь хэд хэдэн хувилбараас сонгосон хэрэг биш. Хамтлагийн маань ахлагч басс гитарчин Энэрэлт рок хамтлаг байгуулбал гоё гэж ярьдаг байлаа. Тэгж ярьж байх үед нь би рок хөгжмийн талаар мэддэг ч үгүй байсан. Есдүгээр ангид Энэрэлт "Хэдүүлээ хамтлаг байгуулж урлагийн үзлэгт оръё" гээд. Тэгээд Бадсэр бөмбөрчин, Солонгоо даралтат хөгжимчин, Энэрэлт басс гитарчин, Мөнхбат соло гитарчин, Даваа бид хоёр хоёулаа гитаргүй ээлжилж дуулдаг байхаар хамтлаг байгуулаад. Тэгж эхэлсэн түүхтэй.

-Одоо хамтлагийн ажил сайнуу.

-Сайн. Шинэ цомгийн спонсор шийдэгдэхгүй жаахан цаг алдаад л байна. Спонсор хайж байгаа гэдгээ хэлчихлээ.

-Уг нь хэлэхгүй гэж бодож байсануу?

-Тийм. Гэхдээ яах вэ, яагаад болохгүй гэж, үнэн л юм чинь. Бид хоёр дахь альбомоо гаргах тун дөхөж байна. Биднийг сонсох дуртай, анхны альбомыг маань байнга сонсч байсан хүмүүс биднийг юм хийхээ байсан, алга болчихлоо гэж бодож байж болох юм. Бид хоёр дахь цомгоо гаргахаар бэлтгэж эхэлснээс хойш ямар нэг тоглолтод оролцохгүй байхыг хичээсэн л дээ. Учир нь шинэ дуунуудаа цомог болгосныхоо дараа хүмүүст "амьд"-аар тоглож, дуулж сонсгоё гэж шийдсэн. Шинэ дуунууд маань хуучин дуунуудыг маань бодвол огт өөр. Хуучны маань дуунууд цаашдаа "Моханик"-т зохихгүй тийшээ болно.

-Эрс өөрчлөлт хийжээ?

-Тэгсэн. Бидний сонирхол, хандлага, үзэл бодол өөрчлөгджээ. Төлөвшиж зүг чигээ олж байгаа санагддаг. Тиймээс ч хийж байгаа бүтээлүүд маань одоо л яг "Моханик"-ийн бие даасан өнгө төрхийг илэрхийлж эхэлж байх шиг байна. Бид саяхан дөрөвдүгээр сарын сүүлээр хоёр ч гоё тоглолтонд оролцож өөрсдийн найман шинэ дуугаа хүмүүст амьдаар сонсгоход их гоё хүлээж авсан.

-Шинэ цомог нь урьдынхаас ямар ялгаатай гэнэ ээ?

-Манай анхны цомогт орсон дуунууд өөр өөр хугацаанд гарсан, тэгээд ч бид цомог болгоно гэж яриагүй байхдаа гаргасан 10 дуу байдаг. Харин энэ шинэ цомгийн тухайд анхнаас нь нухацтай хандсан. Дуунууд хоорондоо нэг зүйлээр уялдаатай, нэг үндэс, агаартай байхаар бодож хийсэн. Эхний асуудал юу вэ, биднийг тодорхойлж чадах, өөрсдийн гэсэн онцлогийг харуулах зүйл юу вэ гэдгийг бодолцож ажилласан. Энэ бүхний хариулт нь "Бид монгол хүмүүс" байлаа (инээв).

-Өмнө нь монгол гэдгээ бага мэдэрдэг байж?

-Насаар бага байжээ. Бидний анхны альбомын дуунуудад монгол аялгуу шингэсэн байдаг л даа. Түүнийг бид өөрсдийнхөө онцлог гэж боддог байсан. Тэр бодлоо гүнзгийрүүлж, шинэ цомгийнхоо дуунуудын үндэс, агаар болгосон. Мэдээж аялгуу, ритм дээр нэмээд дууны үг, утга санаа, түүнийг гаргах хэлбэр, донж их чухал байсан. Шинэ дуунуудын маань нэр болоод утга санаа байгальтай их холбоотой. Хүний дотоод ертөнц, араншинг байгалийн үзэгдэлтэй уялдуулан илэрхийлсэн. Байгаль хүн хоёрын сэтгэлийн холбооны тухай үг нэлээд бий. Байгалийг сэтгэлтэй гэж үздэг. Бид бүгд л гэв гэнэт байгальдаа хайртай болчихсон (инээв). Гэхдээ бид хэв маягаа нэг их хэтрүүлж өөрчлөөгүй ээ, рок хамтлаг хэвээрээ. Жаахан хүч нэмж, утгыг гүнзгийрүүлсэн. Дуунуудаа ямар нэг студид биш, байгальд бичүүлье гэж шийдсэн. Тийм болохоор Амарбаясгалант хийдийг сонгож, тэнд нэг өдрийн турш байж дуунуудаа бичсэн. Бичлэгийн үеэр үнэхээр сайхан байсан. Дээшээ харна тэнгэр, нар, үүл. Шувуу нисээд л. Нэл эерэг энерги дунд дуунуудаа бичих шиг л болсон. Хүмүүст үзүүлэх видео бичлэг бий, альбомоо гарсны дараа үзүүлнэ ээ.

-Хамтлагийн гишүүд дор бүрнээ өөр өөр ажил хийж, уран бүтээл хийхдээ л нэгддэг үү, эсвэл зөвхөн хамтлагийн уран бүтээлдээ 100 хувь өөрсдийгөө зориулсан хүмүүс байдаг уу. Тийм бол та бүхэн уран бүтээл, цомгийн борлуулалтын орлогоороо амьдралаа авч явдаг хүмүүс гэсэн үг ээ дээ. Ингэж амьдрах Монголд жаахан хэцүү юу. Яаж зохицуулдаг вэ?

-Хэцүү хэцүү. Рок хамтлагаар мөнгө олох хэцүү. Харин "амьд" хөгжмийн хамтлагаар мөнгө олох нэг ч их хэцүү биш (хэлээ гаргав). Ер нь бол хэцүү дээ. CD гаргалаа, зардаг газар нь 40 хувийг нь авна. Хүмүүс бараг CD авдаггүй. Авсан нэгнээсээ хуулж авна, цахимаар тараана. Hitone, unimusic энэ тэр бидний бүтээлийг зөвшөөрөлгүй ашиглана. Оюуны өмчийг хамгаалах хууль бүрэн хэрэгждэг бол юу гэж ингэх вэ. Энэ хууль хангалттай хэрэгждэг бол уран бүтээлч хүмүүс хангалттай амьдарч болохоор байна. Тэр сайхан өдрийг хүлээгээд л хөгжмөө тоглоод л байж байна даа. Гэхдээ бидэнд хөгжмөөс гадуур сонирхдог зүйлс байдаг. Тэр чиглэлээрээ ажиллаад л хөгжмөө ч тоглоод л байна.

-Гадаадад та бүхнийг хаана сонсч байна?

-Гадаадад "100-гийн ундаа" мэдэх хүмүүс л бидний дууг сонсдог байх даа. Очиж "амьд"-аар тоглож өгөх юмсан. Бид хоёр гурван ч удаа Бээжин, Шанхайд очиж тоглож байлаа. Манай улсад ажилладаг байсан америк Брайн гэж залуу биднийг сонсоод, таалагдж байна гээд урьж аваачиж тоглуулсан. Цаашид илүү хол явж тоглохыг хүсч байна.

-Та нар өөрсдийгөө хувь хүмүүсийн хувьд ч, уран бүтээлчдийн хувьд ч гэсэн эрх чөлөөтэй хүмүүс гэж мэдэрдэг үү?

-Бид дуртай зүйлээ өөрсдийгөө баясгах гэж хийдэг, тэгээд хүмүүстэй хуваалцдаг. Харин хүмүүс юу мэдэрснээ бидэнтэй хуваалцдаг. Тэгэхээр энэ эрх чөлөөтэйн шинж болов уу.

-Танай хамтлагайнхан хэр эвтэй вэ, бие биеийнхээ үгийг хэр сонсдог вэ?

-Ер нь бол гайгүй. Харин бэлтгэл хийх тал дээр жаахан асуудалтай. Шалтгаан нь ч ялихгүй. Цагаасаа хоцорч ирдэг зуршлаасаа салж чадахгүй байгаа юм. Сүүлдээ торгуулийн системд ороод. Таван минут хоцорвол 500 төгрөг. Үүнийгээ яг таг хөтөлдөг хар дэвтэртэй болсон.

-Зүгээр юм биш үү?

-Байдал дээрдэж байгаа.

-Цоожоо ер нь даруухан талдаа юу, үгүй юу, би мэдэхгүй болохоороо тэгж хараад байна уу?

-Би даруухан хүн биш ээ. Би олон янзын зан чанартай. Хэрэглээний тухайд даруухан гэж өөрийгөө боддог. Харин хувцаслалтын тухайд аль болох даруу биш байхыг боддог.

-Гэр бүлтэй юу?

-Эхнэр хүүхэд байхгүй. Одоохондоо тэр талаар бодсон зүйл алга. Нэг сайхан өдөр зөв хүнээ олоод эхнэрээ болгох л байлгүй. Эхнэртэй болвол хүүхэдтэй болж таарна (инээв).

-Жаахан зүрхшээгээд байгаа юм уу, үгүй юу?

-Үгүй ээ. Болох юм болдгоороо болох биз ээ.

-Хэдэн нас хүртлээ хамтлагтаа байна гэж боддог вэ. Залхах үе байдаг уу?

-"Моханик" юу ч хийхээ байсан бид "Моханик"-ийнхан хэвээрээ л байх болно. Хэчнээн ч юм хийхгүй, "хаалгаа барьсан" байсан ч хааяа нэг цуглаж бутрааж байх байлгүй. Хэдэн ч настай байсан. Дуу хөгжим миний амьдралын салшгүй хэсэг нэгэнт болсон. Насан туршдаа уран бүтээл хийсээр байх болно.

-Та залуусын ямар нэг клубт харьяалагддаг уу?

-Одоохондоо үгүй.

-Фэйсбүүкт хэдэн найзтай. Тэд юун тухай гол нь асуудаг вэ?

-1500 гаруй найзтай. Ихэнхийг нь танихгүй ээ. Хамтлагтай маань холбоотой зүйл хааяа асуудаг.

Твиттерт жиргэдэг үү?

-Би онлайн ертөнцөд олон үйлдэл хийхээс залхуурдаг. жиргээчид хэтэрхий их юм ярьдаг. FB, Instagram хоёрыг л ашигладаг.

-Таны утасны дугаар энгийн санагдсан. Зарим хүн гоё дугаарын төлөө юугаа ч өгөхөд бэлэн байх юм. Та өөр юм аа, яагаад?

-Би өөрийгөө онцгой юмаар гангарах дургүй гэж хэлэхгүй. Гэхдээ миний дугаар их онцгой л доо (инээв). Гоё дугаар хөөцөлддөх нь өөрийгөө илэрхийлэх нэг хэлбэр гэж үздэг байх л даа. Бусадтай адилхан болох гээд өөрт зохиогүй зүйл хүсээд байвал харамсалтай.

-Хувцасны сонголтдоо хэр анхаардаг вэ. Брэнд хөөдөг үү. Тийм бол алийг таашаадаг вэ?

-Би брэнд энэ тэр нэг их хөөцөлддөггүй ээ. Таарсан, сонирхолд нийцсэн хувцас өмсөх л гоё. Брэнд бол брэнд, имиж бол имиж шүүдээ.

-Ном хэр уншдаг вэ. Сүүлд ямар ном унпшв. Ямар санаа оноо, ухаарал олж авав. Хэн гэдэг зохиолч, яруу найраг-чийн бүтээлийг таашаадаг вэ?

-Ном бараг л уншдаггүй. Дуусгасан нэг ч ном байхгүй байх. Гоё үгтэй дуунууд ихийг бодогдуулдаг. Ном уншсантай л адил болдог. Гэхдээ ном унших хэрэгтэй, хэрэгтэй.

-Гадаадын хамтлагуудаас алийг сонсдог вэ, яагаад?

-Velvet Underground, Lou reed, Canned Heat, Black, Keys, Bob Dylan, Led Zeppelin, Pink Floyd, Doors, Devendra Banhart, Iggy Pop, Jamie T, Jimi Hendrix, Flat Duo Jets гээд олон. Тэд надад мэдрэмж өгдөг. Монголоос бол нэг л хамтлагийг маш их сонсох дуртай. Тэр нь "Соёл эрдэнэ".

-Нээрэн Жэки Чан танай хамтлагийн нэг уран бүтээлийг дэмжиж санхүүжүүлсэн юм билээ. Яагаад танайхыг сонгох болсон юм бол. Энэ түүхийг яриач.

-Нэг хүн бидэнд тусалъя гээд Жэки Чантай холбож өгсөн. Тэгэхэд нь Жэки Чан зөвшөөрөөд манай эхний альбомны хэвлэлтийн зардлыг гаргаж өгсөн юм. Тэр холбож өгсөн хүнд дандаа баярлаж явдаг.

-Манай уншигчдад хандаж өөр юу хэлмээр байна?

-Манай аав ээжүуд, ах эгч нар нэг үе биднийг юу хийгээд яваад байгааг ойлгохоо байсан байлаа. Харин одоо бол шинэ уран бүтээлийг маань бүрэн сонсоод ирэхээр тэд биднээр бахархана. Лав манай аав надаар бахархаад эхэлсэн. Тэгэхээр танай сонины уншигчид ч гэсэн манай шинэ уран бүтээлийг таалах байх. За, энэ 2013 оныг сайхан өнгөрүүлээрэй найзууд аа. "Моханик" тоглолтоо хийнэ ээ. Энэ зун лаг том газар хийнэ. Та бүхнийг хүндэтгэсэн Самбалхүндэв овогтой Цогт.