Яг үнэнийг хэлэхэд бид 1999-2001 оны хооронд Москвад халаасны хулгай хийж амьдардаг байлаа. Эх орныхоо ядарсан ард түмний халаас хотыг тэмтэрч байхаар баян оросуудыг мулзалж байсан нь дээр гэж бодоод л тэр шүү дээ. Би тэр үед Киевсхий вокзалын хажууханд гурван өрөө байр түрээслэн найз Насанжаргалынхаа хамт сайхан амьдарч байлаа. Бид оросуудаас гадна Москвад жуулчилж яваа гадаадын иргэдийг дөнгөөд байна. Арбат,Улаан талбай, ГУМ, ЦУМ хавиар ажилладаг байсан. Долоо хоногтоо 1000 доллар ядрахгүй олчихно. Ингэж яваад 2001 оны 3-р сарын 11-ний орой бид хоёр "Старый Арбат" орчмоор "гонио" хийгээд явж байтал бидний өмнө залуухан эрэгтэй эмэгтэй орос үнсэлцээд ухаан мэдрэлгүй амьтад явж байсан юм. Араас нь дагасаар метронд орлоо. Тэр үед шөнийн 22 цаг болж байсан болохоор метронд хүн цөөтэй байсан. Нөгөө хоёр залуу хос цахилгаан шатаар доош уруудахдаа ч үнсэлцсэн чигээрээ, хажууд нь бөмбөг дэлбэлсэн ч мэдэхээргүй байсан. Би тэдний араас орж, Насанжаргал намайг халхлан "китилдэх" маягаар дагалаа. Хэдэн мойног хурууныхаа авъяасыг узүүлж хүүхний цүнхийг нь зүсч, 500 доллар салгав. Тэгээд бид хоёрыг буцаж шатаар өгсөн метроноос гарах үед энгийн хувцастай хоёр булиа залуу үгийн зөрөөгүи гавлаад авч явдаг байгаа. Тэндээс биднийг "Старый Арбат"-ын хажуугийн цагдаагийн 5-р тасаг дээр авчирч, байцаалт явуулж эхлэв. Бид тооцоо алдчихжээ. Оросууд тэр үед Чеченьтэй байлдаж байсан, үүний улмаас Москва болон том хотуул. олон нийтийн хөл хөдөлгөөн ихтэй газар метронд хаа сайгүй камер суурилуулж тусгай албаныхан нүд салгалгүй хянаж байсан юм гэнэ. Азгүй новш чинь камерт нь өртөж хулгай хийж байсан үйлдэл тэр чигээрээ бичигджээ. Хамгийн гол нь би хэргээ шууд хүлээж, найз Насанжаргалыгаа энэ хэрэгт хамаагүй болохыг зорьсон. Ингээд бид хоёрыг 72 цаг саатуулахаар болов. Үүний дараа Насанжаргал батлан даалтанд гарч. би цааш шалгагдаж, тэр суллагдсан. 72 цаг саатуулах байр нь гэхэд цэвэрхэн тохилог. Цагаан хэрэглэл өгч, хоол унд сайтай. Тэнд вареньтай талх, түрс, томаттай загас идээд л сууж байдаг юм байна. Би тэнд очоод их сонин зүйл харсан. Миний байрлаж байсан өрөөний нааран дээр "Миний нэрийг Батхуяг гэдэг. Би хүн амь, дээрмийн хэргээр шалгагдаж байгаа. Бодвол олон жил авах байх. Хэрвээ та эндээс гардаг юм бол Монголд байгаа энэ утсаар манай гэрийнхэнд мэдэгдээрэй" гээд утасны дугаар, гэрийнхээ хаягаа биччихсэн байсан.

Гурав хоногийн дараа намайг алдарт "Бутырк"-ийн мөрдөн рүү авч явлаа. Хаант засгийн үеийн харгис хэрцгийгээрээ алдартай уг мөрдөнд 25 мянган хүн хоригдож байлаа. Очсон өдрөө хурууны хээ, гурван талаас зураг авч, жигнэж үзээд хүлээлгийн өрөөнд оруулсан. Хүлээлгийн өрөөнд 50 хүн баригдаж ирсэний ихэнх нь Оросын бага ястнууд байв. Ихэнх нь визийн зөрчилтэй, жижиг.сажиг хэрэг үйлдсэн гэнэ. Тэнд ороод байж байтал цагийн дараа гаднаас бороохой барьсан муухай царайтай гурван хянагч ороод ирлээ. Тэд надтай нэг өрөөнд хоригдож байсан ази төрхтэй залууг шууд л аймшигтайгаар зодсон. Удалгүй модон шалан дээр улаан дрожи дэвсчихэв уү гэмээр ази залуугиин цус талаар нэг бүрхээд үнэхээр аймаар боллоо.

Лав тэр залууд хугараагүй үлдсэн хавирга байгаагүй. Би хажуудах орос залуутаасаа "Яагаад энэ залууг зодоод байгаа юм бэ?" гэж асуулаа. Гэтэл тэр "Чи айх хэрэггүй, энэ чинь чечень хүн. Чеченүүдийг ингэж байвал таарна" гэж ер тоосон шинжгүй хэлэв. Маргааш өглөө нь өчигдөрийн баригдаж ирсэн нөхдийг камерт хувааж, намайг гадаадуудыг хорьдог тусгай корпус руу явуулсан. Манай өрөөнд гадаад гээд байхаар сүртэй хүмүүс байгаагүй. Хуучин Оросын бүрэлдэхүүнд багтаж байсан белорусь, молдав. хэдэн багууд байв. Камерт бие биенэ дарамталдаг, хоол ундыг нь дээрэмдэх явдал байхгүй. Хоорондоо зохицоод л болоод байна. Өдрийн хоол ундны норм нь гайгүй. Гадаадууд гэсэндээ надаас бусад нь эргэлт сайтай. Ганц хэцүү зүйл гэвэл надтай цуг хоригдож байсан азербейджан, киргиз, башкир гээд багууд өглөө орой уншлага уншаад унтуулахгүй. Нэг сонин зүйл нь лалынхан шээх болгондоо бэлэг эрхтнээ угаадаг, их цэвэрч улс юм билээ. Сарын дараа надаас Сергей Алтунин гэгч мөрдөн байцаагч мэдүүлэг авсан. Надаас метронд болсон хэргийн талаар тодруулах болов уу гэж бодтол шал өөр хэрэг чихэж гарав. "Та 2000 оны 12-р сарын 25-нд Смоленская станц дээр 50 настай В гэгчийн хоолойг хэрчиж, түүний биед байсан алтан гинж, 25000 рубль, 8000 еврог дээрэмдсэн" гэдэг байгаа. Би ч айх, гайхах зэрэгцэн "Би ийм хэрэг хийгээгүй" гэж үнэнээ хэллээ.

Гэвч Сергей Алтунин "Монгол оо, чи удахгүй хэргээ хүлээх л болно доо" гээд гараад явчихав. Маргааш нь намайг гадаадын иргэдийг хорьдог камераас гаргаж вор законуудын суудаг камер хэсүүлж дарамталж эхэлсэн. Би Бутыркийн шоронд зургаан сар суухдаа чамгүй зовлон амссан юм шүү. Хүн амины хилс хэрэгт гүтгэгдэж, нийт 11 удаа камер хэсч, таван удаа 7-14 хоног өлсгөлөн зарлаж, мөрдөнгийн сахилгад есөн удаа орсон байдаг. Мөрдөнд байцаагч надтай зургаан удаа уулзаж байцаалт авсан. Түрүүчийн асуусан асуултаа л давтана. "Чи хүн алснаа хүлээ. Чамд үсрээд л таван жилийн ял онооно. Ингэж гүрийгээд чи өөрөө л эрүүл мэндээрээ хохирно шүү" гэж хүртэл панаалдаж үзсэн. Би гүрийдэгээрээ гүрийж, хилс хэрэг хүлээгээгүй.

Хагас жил Бутыркийн мөрдөнд суусны дараа шүүх хуралд оруулсан. Хулгай хийсэн хэрэгт нэг жил зургаан сарын хорих ял, хүн амины хэрэгт 15 жилийн хорих ял оноож, нийт 16 жил зургаан сарын хорих ялыг чанга дэглэмтэй хорих ангид эдлэхээр шийдвэрлэв. Таслагдсан даруйд манайхаар бол дамжин хорих юм даа, Москвагийн зүүн зах Красный прянскийн дамжин өнгөрүүлэхэд хүргэж өглөө. Өрөөндөө 70-80 хүнтэй. Өдөр болгон өөр шорон руу ачлага явна. Бас өөр шорон, анх таслагдсан хоригдлууд нэмэгдэж ирээд мөнхийн хөдөлгөөнтэй. Тэнд анх очоод Галт гэдэг монгол залуутай таарлаа. Түүнийг хараад золтой л нулимс дуслуулчихсангүй. Галт намайг бодвол хоёр дахь удаагаа шоронд орсон, орос хэлтэй, Оросын эрүүгийн хуулийг сайн мэддэг. Миний хэргийг Галт сонсоод "Чи Оросын чангын шоронд 15 жил суугаад амьд гарч чадахгүй. Чамд энэ ял цаазын ял гэсэн үг. Тиймээс давж заалдах хэрэгтэй" гээд миний өмнөөс дээд шүүхэд давж заалдах өргөдөл бичсэн.

Өргөдлийн хариу хоёр сарын дараа гарч анхан шатны шүүхийн шийдвэрийг хэвээр баталж орхив. Гэтэл Галт маань Оросын Ерөнхийлөгч Путинд хандаж өргөдөл явуулсан. Бутыркийн шоронг бодвол энд дэг, дигарамм нь илүү. Хоол унд ч гэсэн тийм сайн биш. 70-80 хоригдолыг гурван давхар нааранд байрлуулж, гурав хуваана. Өдрийн 24 цагийн эхний найман цагт нэг давхрын наарныхан унтаж, хоёр давхрынхан наарандаа хөдөлгөөнгүй, чимээгүй сууцгааж, гурван давхрын наарныхан өрөөндөө чөлөөтэй холхиж болно. Найман цагийн дараа хоёр давхрынхан унтаж, гурван давхрынхан нааран дээр чимээгүй сууж, нэг давхрынхан өрөөнд холхих гэх мэтээр ээлжилнэ. Өрөөний смотрешыи, өрөө харгалзагчаар Коля гээд 12 жилийн хорих ялаар шийтгүүлсэн урьд өмнө 15 жил шоронд суусан эр байлаа. Түүний харцаар 70 хоригдол бөмбөрнө.

Галт бол өрөөндөө хөлөө олчихсон, Коля болон тэдний гал хамуудтай гайгүй харьцаатай байв. Колягийн гал хамууд өрөөний хойморт тусгай нааран дээр өнгөт зурагт үзээд, тансаг хоол хүнс хэрэглэнэ. Оросын шоронд манайхаас нэг ялгаатай зүйл нь шоронд хулгай хийнэ гэсэн ойлголт байхгүй. Тэр бүү хэл хараалын үг хэлвэл алуулна. Галт намайг орж ирсэн өдөр энэ бүхнийг захиж "Монголчуудын амны уншлага болсон П... хараалыг хэрхэвч хэлж болохгүй шүү. Тэгвэл чи шууд доошоо орно" гэж захиж билээ. Удалгүй Галт Мордовын шорон руу ачигдаж, би ганцаараа үлдлээ.

Хэд хоногийн дараа Орост амьдардаг Мухаммед гэдэг иран залуу миний өрөөнд орж ирсэн. Би түүнтэй дөрвөн сар гал хам байлаа. Мухаммед Москвад бизнес хийж байгаад, татвараас зайлсхийсэн хэргээр нэг жилийн хорих ялаар шийтгүулсэн гэсэн. Тэр хэргээ ярихдаа өөрийгөө ямар ч хэрэг хийгээгүй, өрсөлдөгч бизнесменүүд нь энэхүү хэрэгт түлхэж оруулсан гэдэг. Гэтэл нэг өглөө хянагч миний нэрийг дуудаад шоронгийн төлөөлөгчийн өрөөнд хүргэж өгсөн. Шоронгийн төлөөлөгч надад "Чиний Ерөнхийлөгчид өгсөн өргөдлийн хариу ирсэн. Чиний хэргийг ахин шалгуулахаар боллоо. Юмаа бэлд, маргааш буцаад Бутырк явна" гэлээ. Ингээд миний хэрэг задарч, би ганцхан халаас суйлсан хэрэг дээрээ нэг жил, зургаан сарын хорих ял авсан. Гэтэл ашгүй мөрдөнд суусан хугацааг минь харгалзан үзэж, шүүхээс шууд сулласан. Тиймээс би ОХУ-ын ерөнхийлөгч В.Путйнд их баярлаж явдаг юм. Түүнийг энэ яваа насандаа шүтэж амьдарна аа.

Эх сурвалж: Ноцтой мэдээ